Беларускім жанчынам дадуць дзве бясплатныя спробы зацяжарыць з дапамогай ЭКА

• 23.03.2026, 19:50

Падпісаны указ.

Аляксандр Лукашэнка падпісаў указ, які прадугледжвае правядзенне двух бясплатных спроб ЭКА замест адной. Скарыстацца імі змогуць не толькі замужнія жанчыны, але і тыя, хто не складаецца ў шлюбе.

Для гэтага неабходна выконваць некалькі ўмоваў: узрост жанчыны не павінен перавышаць 40 гадоў, а таксама павінны быць медыцынскія паказанні пры адсутнасці супрацьпаказанняў да працэдуры.

Калі першая бясплатная спроба ЭКА была паспяховай і скончылася нараджэннем дзіцяці, у жанчыны застаецца права на другую бясплатную працэдуру ЭКА да 49 гадоў.

Як і раней, ЭКА будзе праводзіцца ў дзяржаўных медыцынскіх установах, пералік якіх вызначае Савет Міністраў. Асноўныя палажэнні ўказа пачнуць дзейнічаць праз тры месяцы пасля афіцыйнага апублікавання.