Навукоўцы стварылі сістэму рухавікоў, якая працуе як чалавечыя мышцы

• 23.03.2026, 22:41

Без складанага кіравання.

Даследчыкі з Універсітэта Брысталя стварылі сістэму з простых механічных рухавікоў, якая ўзнаўляе працу чалавечых цягліц: яна сама падладжвае сілу пад нагрузку і каардынуе рух без складанага кіравання.

Пра гэта піша выданне Interesting Engineering.

Сістэму сабралі з невялікіх электрарухавікоў, дэталяў, надрукаваных на 3D-прынтары, і акрылавых элементаў. Яна імітуе працу актаміязіну — малекулярнай сістэмы, адказнай за скарачэнне цягліц.

У мадэлі рухавікі ўзаемадзейнічаюць толькі праз кароткі механічны кантакт у спецыяльна спраектаванай канструкцыі. Нягледзячы на простату, сістэма ўзнаўляе важную ўласцівасць цягліц — здольнасць задзейнічаць больш «рухавікоў», калі павялічваецца нагрузка.

Падчас эксперымента прылада сама арганізоўвалася ў хвалі руху і аўтаматычна падладжвалася да зменаў сілы. Гэта працуе гэтаксама, як у жывых цягліцах, калі яны павялічваюць намаганне пры неабходнасці.

Даследчыкі выявілі, што такая зладжаная праца можа ўзнікаць не толькі з-за складаных біяхімічных працэсаў, але і дзякуючы пабудове самой сістэмы і механічнаму ўзаемадзеянню яе частак. Кожны рухавік уплывае на іншыя праз агульную аснову, і з цягам часу яны сінхранізуюцца.

Паводле слоў навукоўцаў, гэта адкрыццё можа дапамагчы ствараць больш мяккіх і гнуткіх робатаў, якія самі падладжваюцца да ўмоў без складанага праграмавання. У прыватнасці, інжынеры хочуць прымяніць гэтыя прынцыпы для распрацоўкі штучных цягліц і сістэм, якія аўтаматычна рэагуюць на змены.

Даследаванне таксама можа дапамагчы лепш зразумець, як працуюць чалавечыя цягліцы і што ўплывае на іх працу. Гэта важна для вывучэння старэння і хвароб, у прыватнасці цягліцавай дыстрафіі, і можа стаць асновай для новых падыходаў у медыцыне.