Міністр замежных спраў Венгрыі прызнаў тэлефонныя званкі Лаўрову
- 24.03.2026, 16:49
Сійярто звязваўся з Масквой пасля перамоваў Еўрасаюза.
Міністр замежных спраў Венгрыі Петер Сійярто заявіў, што ён зносіцца са сваімі калегамі ў Расіі, ЗША і іншых краінах як перад, так і пасля завяршэння пасяджэнняў знешнепалітычнага кіраўніцтва Еўрасаюза, піша Politico. «Я зносюся не толькі з міністрам замежных спраў Расіі, але і з прадстаўнікамі ЗША, Турцыі, Ізраіля, Сербіі і іншых нашых партнёраў да і пасля пасяджэнняў Савета Еўрапейскага саюза», — сказаў Сійярто падчас перадвыбарнага мітынгу вечарам 23 сакавіка.
Раней еўрапейскія крыніцы The Washington Post распавялі, што міністр замежных спраў Венгрыі выкарыстоўваў перапынкі падчас сустрэч з прадстаўнікамі іншых краін — членаў ЕС, каб звязвацца па тэлефоне з кіраўніком МЗС РФ Сяргеем Лаўровым. Пасля гэтага польскі прэм'ер Дональд Туск заявіў, што прадстаўнікі Будапешта «ва ўсіх падрабязнасцях інфармавалі Маскву пра пасяджэнні Савета ЕС», а Брусэль пачаў абмяжоўваць удзел Венгрыі ў канфідэнцыйных сустрэчах праз асцярогі, што Сійярто можа перадаваць сакрэтныя даныя Маскве.
Сам міністр замежных спраў Венгрыі падчас мітынгу патлумачыў, што тэлефанаванні з калегамі з іншых краін з'яўляюцца «сутнасцю знешняй палітыкі»: «Магчыма, гэта прагучыць рэзка, але дыпламатыя — гэта дыялог з лідэрамі іншых краін». Паводле яго слоў, у ЕС прымаецца мноства рашэнняў, якія ўплываюць на адносіны і супрацоўніцтва Венгрыі з іншымі дзяржавамі, што не ўваходзяць у аб'яднанне.
У нядзелю Сійярто, каментуючы словы Туска, абвінаваціў яго ў «распаўсюдзе хлусні і фэйкавых навін». Свайго калегу па ўрадзе Венгрыі падтрымаў кіраўнік міністэрства ў справах Еўропы Венгрыі Янош Бока. Ён заявіў, што сцвярджэнні прэм'ер-міністра Польшчы з'яўляюцца няпраўдзівымі і «адчайнай рэакцыяй на тое, што «Фідэс» [партыя прэм'ер-міністра Венгрыі Віктара Орбана] набірае абароты ў перадвыбарчай кампаніі».
Парламенцкія выбары ў Венгрыі, якія могуць прывесці да змены ўрада Орбана, што мае сувязі з Масквой, адбудуцца 12 красавіка. Як паведамляла Financial Times, дзеля падтрымкі свайго саюзніка Крэмль прапанаваў план па распаўсюджанні дэзінфармацыі ў венгерскіх сацсетках. Прапагандысцкая кампанія прадстаўляе Орбана як адзінага кандыдата, здольнага захаваць суверэнітэт краіны.
Акрамя таго, Масква, каб паўплываць на вынік выбараў, прапаноўвала інсцэнаваць замах на Орбана, сцвярджала WaPo са спасылкай на ўнутраны даклад Службы знешняй разведкі РФ.