Лукашэнка патрабуе грошы за «вызваленне» фур

• 24.03.2026, 17:42

Літоўскія перавозчыкі не могуць выехаць з Беларусі з-за рахункаў за стаянку.

Праз чатыры месяцы з Беларусі ў Літву пачалі вяртацца літоўскія цягачы, аднак паток машын невялікі. Прадстаўнікі перавозчыкаў кажуць, што не ўсе кампаніі ў стане аплаціць выстаўленыя Мінскам рахункі за стаянку. Акрамя таго, узнікае пытанне, як заплаціць грошы кампаніі, што знаходзіцца пад санкцыямі, піша выданне Delfi.

Пра рашэнне Аляксандра Лукашэнкі выпускаць літоўскія фуры стала вядома 23 сакавіка — на наступны дзень у Літве паведамілі пра ўезд васьмі цягачоў. Паводле інфармацыі беларускіх уладаў, на мяжы скупчылася каля 1900 літоўскіх транспартных сродкаў — і машын, і паўпрычэпаў.

«Учора мы атрымалі афіцыйны дакумент, сёння вярнуліся першыя цягачы. Цяжка сказаць, як будуць вяртацца цягачы, цяпер перавозчыкі збіраюць грошы. Сітуацыя не для ўсіх спрыяльная. Вы, напэўна, разумееце, што калі ў кампаніі 100 цягачоў, 10 з іх затрымаліся, то вялікай праблемы не будзе, а калі ў кампаніі іх 10, а 9 з іх затрымаліся, зразумела, што кампаніі будзе складана», — расказаў кіраўнік літоўскай нацыянальнай асацыяцыі перавозчыкаў Linava Эрландас Мікенас.

Спачатку ў Мінску казалі пра 120 еўра/суткі за стаянку, пасля рашэння Лукашэнкі цэны знізілі: счэпка — 163,8 рубля, цягач — 109,2 рубля, паўпрычэп — 54,6 рубля ў суткі. Улады кажуць пра 1900 літоўскіх транспартных сродкаў. Улічваючы, што гаворка пра каля чатырох месяцаў стаянкі (120 дзён), прыкладныя расцэнкі такія: 19 650 рублёў за счэпку, 13 100 — за цягач, 6550 — за паўпрычэп.

Цяпер перавозчыкі вырашаюць, што рабіць, калі заплаціць яны не могуць:

«На ўзроўні чутак мы чулі, што невялікія кампаніі, якія ўваходзяць у склад Linava — у нас шмат невялікіх і сярэдніх кампаній — шукаюць пакупнікоў, якія купяць цягачы і выплацяць доўг».

Яшчэ ёсць важная праблема — атрымальнік плацяжоў за стаянку фур, кампанія «Белтаможсэрвіс», знаходзіцца пад санкцыямі з 3 чэрвеня 2022 г.

«Паводле маіх дадзеных, можна плаціць банкаўскім пераказам, але тут ёсць праблема. „Белтаможсэрвіс“ знаходзіцца пад санкцыямі, таму перавозчыкі думаюць, як заплаціць за транспарт легальна, плацяць праз партнёраў, шукаюць іншыя спосабы», — адзначыў Мікенас.

Транспарт не можа выехаць з Беларусі, пакуль кампанія не заплаціць грошы за стаянку. Паводле дадзеных Linava, цяпер у Беларусі можа быць каля 4000 транспартных сродкаў.