Украінская выведка знішчыла расійскія гіпергукавыя ракеты «Цыркон»

• 24.03.2026, 18:08

Паспяховая аперацыя ў Крыме.

Галоўнае ўпраўленне выведкі Міністэрства абароны Украіны апублікавала відэа знішчэння ў Крыме пускавой устаноўкі «Бастыён-М» і дзвюх дарагавартасных ракет «Цыркон».

Пра гэта паведаміла прэс-служба ГУР МА ў сваім Telegram-канале.

У ноч на 24 сакавіка байцы Дэпартамента беспілотных сістэм Галоўнага ўпраўлення выведкі высочылі ў Крыме калону пускавых установак «Бастыён-М», якая рухалася да пазіцый.

У выніку удараў знішчана адна з пускавых і дзве дарагавартасныя ракеты «Цыркон». Яшчэ адзін «Бастыён» атрымаў пашкоджанні.

Як паведамляе ГУР, забітых і параненых — сем расіян.

Галоўнае ўпраўленне выведкі заяўляе, што армія РФ выкарыстоўвае ракеты «Цыркон» са складу комплексу «Бастыён» перш за ўсё для тэрару грамадзянскага насельніцтва Украіны, у прыватнасці, паўднёвых і ўсходніх абласцей.

Ведамства адзначыла, што гэтай ноччу планы расіян атакаваць мірныя гарады былі сарваныя.