Над ЗША праляцеў бамбардзіроўшчык B-52H з прататыпамі новых ядзерных ракет
- 24.03.2026, 20:05
Яго заўважылі над пустыняй Махаве ў Каліфорніі.
Стратэгічны бамбардзіроўшчык B-52H ВПС ЗША, таксама вядомы як «стратасферная крэпасць», з двума прататыпамі новай ядзернай ракеты AGM-181A Long-Range Standoff (LRSO), заўважылі над пустыняй Махаве ў Каліфорніі. Пра гэта паведаміў партал The War Zone.
Здымкі B-52H з новымі ракетамі, а таксама знішчальніка F-22 з малазаметнымі падкрыльнымі паліўнымі бакамі апублікаваў у Instagram авацыйны фатограф Джарод Хэмілтан. Яны былі зроблены ў раёне, дзе звычайна праходзяць лётныя выпрабаванні з базы ВПС Эдвардс у Каліфорніі, адзначыў TWZ.
Паводле выдання, ЗША праводзяць лётныя выпрабаванні крылатай ракеты AGM-181A LRSO ужо некалькі гадоў. Пра яе канструкцыю вядома няшмат; афіцыйны рэндэр ракеты ўпершыню апублікавалі летам 2025 года. Распрацоўка павінна прыйсці на змену састарэлым AGM-86B ALCM.
AGM-181A LRSO будуць абсталёўваць тэрмаядзернай баявой часткай W80-4. Ракеты AGM-86B абсталяваныя W80-1, якая мае два рэжымы магутнасці: прыблізна 5 і 150 кт, напісаў The War Zone. Выданне дадало, што ЗША раней заяўлялі пра планы дасягнуць пачатковай баявой гатоўнасці AGM-181 да 2030 года. Аднак з 2024 года тэрміны аднеслі да катэгорыі «кантраляваная некласіфікаваная інфармацыя» (CUI). З таго часу іх не раскрываюць.
TWZ дадаў, што пачаць маласерыйную вытворчасць планавалі ў 2027 годзе, а паўнамаштабную — у 2029-м. Носьбітамі ракеты павінны стаць B-52H і B-21 Raider.
Малазаметныя падкрыльныя паліўныя бакі для F-22 TWZ назваў крытычна важным дапоўненнем. Дзякуючы ім знішчальнікі змогуць больш эфектыўна дзейнічаць на вялікіх адлегласцях. Гэта дазволіла б задзейнічаць самалёты, вядомыя сваёй абмежаванай далёкасцю, у патэнцыйным будучым канфлікце ў Інда-Ціхаакіянскім рэгіёне, патлумачыў партал. TWZ дадаў, што пакуль не зразумела, калі гэтая сістэма паступіць у эксплуатацыю.
Упершыню фатографам удалося зняць бамбардзіроўшчык B-52H з прататыпам AGM-181A Long-Range Standoff у лістападзе 2025 года. Defense News тады назвала гэтую ракету адным з самых сакрэтных праектаў у праграме мадэрнізацыі амерыканскіх ядзерных узбраенняў. Апытаныя выданнем эксперты тады звязалі дэманстрацыю прататыпа з заявай Расіі пра правядзенне выпрабаванняў міжкантынентальнай крылатай ракеты «Буревеснік» і падводнага безэкіпажнага апарата «Пасейдон» з ядзернымі энергетычнымі ўстаноўкамі.