У ЗША прадставілі трохколавы спарткар у стылі «Формулы-1»

• 25.03.2026, 11:56

Новы Ryn FP3 нагадвае гоначны аўтамабіль і каштуе як кросовер.

Амерыканская кампанія Ryn Motors прадставіла арыгінальны спарткар FP3. Ён нагадвае баліды «Формулы-1», аднак з’яўляецца трохколавым.

Новы Ryn FP3 ужо даступны для замовы, а першыя аўто выпусцяць у лістападзе. Падрабязнасці арыгінальнага аўто апублікавалі на сайце Carscoops.

Ryn FP3 вельмі падобны да балідаў «Формулы-1» — мае выяўлены «нос», антыкрылы спераду і ззаду, а таксама ахоўныя дугі Halo. Аднак ззаду ў яго толькі адно кола — такое рашэнне дазваляе класіфікаваць яго як трыцыкл і абысці патрабаванні да бяспекі аўтамабіляў. Цікава, што пры неабходнасці балід можна пазней зрабіць чатырохколавым.

Аэродынаміка стварае 317 кг прыціскной сілы. Пры гэтым сам Ryn FP3 з алюмініевым манакокам важыць усяго 517 кг. Баковае паскарэнне ў паваротах дасягае 2,6G.

Трохколавае аўто аснасцілі 1,3-літровым рухавіком ад спартбайка Suzuki Hayabusa. У базавай версіі коштам 78 499 долараў (на ўзроўні новага Volkswagen Touareg) ён развівае 210 к.с. пры 10 500 аб/мін і дазваляе разганяцца да 100 км/г за 2,8 с.

Акрамя таго, абвешчаны варыянт Ryn FP3 Turbo з турбонаддувам магутнасцю 290 к.с. Ён будзе каштаваць 101 499 долараў.