У Расіі «адмяняюць» акцёра Дзмітрыя Нагіева з-за ягоных слоў пра вайну

• 25.03.2026, 12:13

Яго ўдзел у тэлевізійных і кінапраектах можа быць абмежаваны.

Расійскі акцёр і тэлевядучы Дзмітрый Нагіеў сутыкнуўся з хваляй крытыкі пасля свайго выступлення на прэм’еры фільма «Ёлкі 12». Яго словы пра сучаснае кіно і тое, што адбываецца ў краіне, выклікалі шырокі грамадскі рэзананс. Пра гэта паведамляе тэлеканал «Дождж» са спасылкай на крыніцы.

Па іх словах, праблемы пачаліся пасля выказванняў артыста на прэм’еры «Ёлкі 12». Падчас зносін з залам Нагіеў саркастычна заўважыў, што з замежным кіно ў расійскіх кінатэатрах «поўная дупа», а пазней так патлумачыў журналістцы папулярнасць франшызы «Ёлкі»:

«Таму што столькі фільмаў пра вайну — проста сіл ужо няма. Шэрасць, бруд… А гэта [«Ёлкі»] — ілюзія мірнага, шчаслівага жыцця».

На пытанне пра найбольш яркую авантуру ў яго асабістым жыцці за мінулы год акцёр адказаў:

«Ты мяне пытаеш на чацвёртым годзе вайны, якія авантуры адбыліся ў маім жыцці?..»

Цяпер рэкламу і фільмы з акцёрам са снежня 2025-га перасталі паказваць па тэлебачанні, а ў новыя праекты Нагіева не бяруць.