Беларусаў на два дні «адключылі» ад знешняга інтэрнэту

• 25.03.2026, 13:40

Улады спалохаліся Дня Волі.

У Беларусі з 20:00 24 сакавіка да 08:00 26 сакавіка абмяжуюць доступ да сайтаў на віртуальным хостынгу за мяжой. Пра гэта папярэдзіў правайдар HB.BY.

Паводле інфармацыі кампаніі, Аператыўна-аналітычны цэнтр пры Прэзідэнце Рэспублікі Беларусь зафіксаваў пагрозу дэструктыўных уздзеянняў у кіберпрасторы. Згодна з Указам Прэзідэнта № 40 «Аб кібербяспецы», хостынг-правайдары абавязаныя прыняць меры абароны.

Для карыстальнікаў унутры краіны сайты будуць даступныя ў звычайным рэжыме. Аднак рэсурсы, якія выкарыстоўваюць знешнія інтэграцыі — плацёжныя сістэмы, API замежных сэрвісаў або знешнія віджэты — могуць працаваць нестабільна ў пазначаны перыяд.

Дзеянні ўладаў прыурочаныя да Дня Волі — свята абвяшчэння Беларускай Народнай Рэспублікі, якое стала сімвалам супраціву рэжыму Лукашэнкі.