Прэзідэнт Літвы: Еўрапейская будучыня чакае Беларусь

• 25.03.2026, 15:25

Вільнюс працягне падтрымліваць перамены ў нашай краіне.

Прэзідэнт Літвы Гітанас Наўседа павіншаваў беларусаў з Днём Волі. У сваім віншаванні адзначыў, што 25 сакавіка сімвалізуе няспыннае імкненне беларусаў да свабоды, незалежнасці і суверэнітэту і мае велізарнае значэнне для ўсіх, хто шануе правы чалавека і дэмакратыю.

«Як вашы суседзі, мы пільна назіраем за вашай адважнай барацьбой за гэтыя агульначалавечыя каштоўнасці. Ваша рашучасць і стойкасць натхняюць многіх людзей і пастаянна нагадваюць усяму міжнароднаму супольніцтву пра важнасць салідарнасці народаў і паслядоўнай падтрымкі тых, хто імкнецца да сваіх асноўных правоў. Дзень Волі — гэта не толькі дзень, калі вы ўспамінаеце сваю барацьбу за свабоду на розных этапах гісторыі і ахвяры тых, хто змагаўся за свабоду народа. Гэта таксама дзень роздумаў пра будучыню — пра еўрапейскую будучыню Беларусі, у якой усе беларусы будуць карыстацца ўсімі свабодамі і магчымасцямі, якіх яны заслугоўваюць», — сказана ў віншаванні Наўседы.

Прэзідэнт Літвы падкрэсліў, што падтрымка яго краінай дэмакратычнай Беларусі, яе незалежнасці і суверэнітэту застаецца непахіснай.

«Жадаю вам заставацца моцнымі і адзінымі перад тварам усіх выклікаў, з якімі вы штодня сутыкаецеся. Працягвайце змагацца за свабоду сваёй краіны і не дазваляйце выкарыстоўваць вашу дзяржаву ў ваеннай агрэсіі Расіі супраць Украіны. Няхай гэты Дзень Волі стане маяком надзеі, які асвятляе шлях да лепшай будучыні Беларусі — такой, у якой перамагаюць дэмакратыя, справядлівасць і правы чалавека. Няхай гэты дзень наблізіць вас да здзяйснення імкнення да вольнай, незалежнай, квітнеючай і еўрапейскай Беларусі. Жыве Беларусь!» — павіншаваў Гітанас Наўседа.