На МКАД будуць выязджаць толькі легкавыя аўто

• 26.03.2026, 7:26

Як гэтага дасягнуць.

У сталіцы хочуць знізіць нагрузку на МКАД і цэнтр горада. Пра гэта піша БелТА са спасылкай на старшыню Мінгарвыканкама Уладзіміра Кухарава.

З-за недасканаласці дарожных зносін жыхары некаторых раёнаў вымушаныя выязджаць на МКАД або ў цэнтр горада, каб дабрацца да пункта прызначэння.

І гэта ўжо прыводзіць да коркаў, адзначыў «мэр».

Каб пазбавіцца ад затораў на дарогах, мінскія ўлады прыступаюць да рэалізацыі маштабнага праекта. Ён дазволіць вырашыць некалькі праблемаў у арганізацыі аўтатранспарту.

Мікрараёны Каменная Горка і Лебядзіны злучыць пуцеправод Калеснікава — Ціміразева. Работы па яго будаўніцтве ўжо пачаліся.

«Пакуль стрымлівальнымі фактарамі з'яўляюцца выхад з зімы і тэхнічная немагчымасць пераносу ўсіх падземных камунікацый», — распавёў дырэктар ДП «Гордорстрой» Сяргей Панеў.

Але дзякуючы міжацяпляльнаму сезону асноўныя магістральныя сеткі цеплазабеспячэння ўдасца перанесці, атрымаецца пераключыць і электрасеткі. Тады і пачнуцца поўнамаштабныя работы, адзначыў Панеў.

Агульная даўжыня пуцеправода — каля 290 м.

У асноўным рух будзе ажыццяўляцца па трох палосах у кожным напрамку. Іх колькасць павялічыцца толькі ў месцах скрыжаванняў, у залежнасці ад прыярытэту напрамкаў.

Першыя пралётныя канструкцыі плануюць узвесці ўжо ў маі—чэрвені 2026 года.

Таксама ў Мінску вырашылі падаўжыць вул. Чурлёніса і пабудаваць пуцеправод праз чыгунку на вул. Каржанеўскага.

Такім чынам мясцовыя ўлады плануюць злучыць Маскоўскі і Кастрычніцкі раёны.

«Мы плануем завяршыць праектаванне да канца года і прыступіць да будаўніцтва ў наступным годзе», — распавёў Кухараў.

З дапамогай падобнага плана злучаць Кастрычніцкі і Ленінскі раёны. Каб гэта зрабіць, вул. Сярова вырашылі падаўжыць, а праз чыгунку — пабудаваць пуцеправод з выхадам на вул. Шпілёўскага.

Падаўжаць і вул. Станіслава Манюшкі, таксама ўзвядуць мост праз Свіслач да вул. Малініна.

Завяршальным этапам стане пашырэнне вул. Шырокай.

«Думаю, гэта створыць больш зручныя ўмовы для руху і лагістычныя ланцужкі, якія дапамогуць жыхарам выбіраць аптымальныя маршруты па Мінску і значна знізяць нагрузку на цэнтр горада і кальцавую дарогу», — падкрэсліў Кухараў.

Кальцавую дарогу збіраюцца разгрузіць і ад грузавых аўто.

Пад Мінскам ужо будуюць пад'ездную дарогу ад МКАД-2 да прамысловага вузла «Калядзічы».

Такім чынам, вялікагрузныя аўтамабілі змогуць заязджаць у прамысловы вузел і не рухацца па МКАД.

Злучаць і вул. Свіслацкую і Селіцкую ў мікрараёне Шабаны. Дзякуючы перамычцы грузавікі змогуць выехаць на дарогу М-5, а потым накіравацца на МКАД-2.

Усё гэта павінна разгрузіць МКАД, пасля гэтага туды амаль што будуць выязджаць толькі легкавыя машыны.