«Лукашэнку недарэмна зазываюць у ЗША»
- 26.03.2026, 16:14
Дыктатар баіцца паўтарыць лёс Мадура.
Прэзентацыя кнігі «Беларусь Наталлі Радзінай» у Таліне адбылася 19 сакавіка — у дзень, калі Мінск наведаў спецпасланнік прэзідэнта ЗША Джон Коул, а з беларускіх турмаў на волю выйшлі 250 палітвязняў. Галоўная рэдактарка сайту Charter97.org Наталля Радзіна адказала на пытанне пра мэты амерыканцаў у кантактах з рэжымам у Мінску:
— Мне падаецца, што цяпер Пуцін і Лукашэнка зацягваюць Трампа ў працэс нейкіх перамоваў, якія не надта на што-небудзь ўплываюць. Але ў нашым выпадку яны прынамсі вызваляюць частку палітвязняў. Расія з ЗША вядзе перамовы нібыта пра вайну ва Украіне, а непасрэдна з Беларуссю Трамп размаўляе пра вызваленне палітвязняў у абмен на адмену санкцый.
Тут мы сутыкаемся з тым таргам, які адбываўся заўсёды, калі Лукашэнка браў палітвязняў у закладнікі пасля кожных прэзідэнцкіх выбараў, а потым «прадаў» іх у абмен на змякчэнне санкцыйнага рэжыму або актывізацыю гандлю з заходнімі краінамі. З аднаго боку, здаецца, што гэта тупік, бо мы шмат разоў бачылі гэты працэс. Але цяпер мы маем справу з такой колькасцю палітвязняў, якой ніколі не было ў гісторыі сучаснай Беларусі. Па-другое, палітвязні ніколі не сядзелі столькі гадоў у турмах — цяпер многія беларусы выходзяць пасля пяці-шасці гадоў зняволення.
Мы бачым, як турма жудасна ўплывае на людзей, яны выходзяць у цяжкім псіхалагічным і фізічным стане. Дастаткова вялікая колькасць палітвязняў (мы не можам назваць дакладную лічбу, але ідзе гаворка пра больш як 10 выпадкаў) памерла ў турмах з-за неаказання медыцынскай дапамогі і катаванняў. Таму тое, што цяпер частка людзей выходзіць у выніку перамоваў ЗША з рэжымам Лукашэнкі, мы вітаем, бо няма нічога важнейшага за чалавечае жыццё.
З другога боку, амерыканскія санкцыі, уведзеныя супраць Лукашэнкі, не надта ўплываюць на сітуацыю ў Беларусі. Значна важней санкцыі, якія ўвёў Еўрапейскі саюз. Таму, калі ў выніку гэтых перамоваў людзі будуць выходзіць на волю, мы гэта падтрымліваем.
Каардынатар грамадзянскай кампаніі «Еўрапейская Беларусь» Дзмітрый Бандарэнка кінуў рэпліку і выказаў цікавую версію, чаму Трамп так настойліва зазывае Лукашэнку ў ЗША, а дыктатар упіраецца:
— Пасланнік Трампа Коул сказаў: «Мы настойліва запрашаем паважанага Аляксандра Лукашэнку з візітам у Вашынгтон». А ён не паехаў. Лукашэнку асабіста запрасілі на трампаўскі «Савет міру», але ён чамусьці адмовіўся. І цяпер Коул кажа Лукашэнку, што «сам прэзідэнт Трамп асабіста нагадвае спадару Лукашэнку, каб ён прыбыў у Вашынгтон, калі будзе пасяджэнне «Савета міру». Я думаю, Лукашэнка ўздрыгануўся, таму што з узурпатарам Мадура таксама вяліся перамовы. Думаю, што ён не паедзе ў ЗША.