Politico: Пентагон засакрэціў планы размяшчэння войскаў ад НАТА і Кангрэса

• 26.03.2026, 11:10

Саюзнікі і заканадаўцы занепакоеныя гэтым рашэннем.

Пентагон упершыню за некалькі дзесяцігоддзяў адмовіўся абнародаваць агляд дыслакацыі сваіх войскаў за мяжой. Гэта стварае няпэўнасць для саюзнікаў і амерыканскіх заканадаўцаў, якія выкарыстоўваюць гэты дакумент для планавання бюджэтаў і аналізу вайсковай палітыкі ЗША, паведамляе РБК-Украіна са спасылкай на Politico.

Паводле звестак крыніц выдання, замест публікацыі афіцыйнага дакумента, вядомага як «Агляд глабальнай дыслакацыі войскаў» (Global Posture Review), які з'яўляецца ключавым для бюджэтнага планавання і разумення палітыкі ЗША, Пентагон плануе весці толькі нефармальныя размовы.

У адміністрацыі мяркуюць, што надалі дастаткова інфармацыі ў іншых стратэгічных дакументах, якія ўказваюць на зрушэнне акцэнту на Заходняе паўшар'е.

Падкрэсліваецца, што гэты крок з'яўляецца часткай тэндэнцыі цяперашняй адміністрацыі дзейнічаць самастойна і інфармаваць партнёраў і Кангрэс пра ваенныя аперацыі ўжо постфактум — ад удараў па суднах у Карыбскім басейне да вайны з Іранам.

Такое рашэнне, верагодна, выкліча сур'ёзную занепакоенасць на Капітолійскім пагорку і ў еўрапейскіх сталіцах, дзе чыноўнікі «адчайна маюць патрэбу ў больш ясным разуменні» ваенных амбіцый ЗША.

Сябры камітэта Сената па ўзброеных сілах заявілі, што іх нават афіцыйна не паведамілі пра адмену публікацыі дакумента, што ўскладніць іх працу над абаронным бюджэтам.

Саюзнікі па НАТА баяцца, што адсутнасць выразнага плана можа прывесці да «нежаданых сюрпрызаў» з боку непрадказальнай адміністрацыі, якая больш засяроджана на ўласнай ваеннай моцы, чым на партнёрстве.

«Галоўны запыт з нашага боку — прадказальнасць. Мы разумеем, што нам трэба актывізавацца і ўзяць на сябе значна больш адказнасці за ўласную бяспеку, і мы гэта робім. Але нам патрэбна прадказальнасць», — сказаў адзін з ваенных чыноўнікаў НАТА.