СМІ даведаліся пра таемную здзелку Ірана і Расіі

• 26.03.2026, 12:15

Яны дамовіліся ў першы дзень вайны.

Расія пачала пастаўляць Ірану ўдарныя беспілотнікі праз некалькі дзён пасля таго, як ЗША і Ізраіль атакавалі Ісламскую Рэспубліку. Пра гэта сведчаць справаздачы заходніх разведслужбаў, з якімі азнаёмілася Financial Times.

Паводле даных разведкі, Масква і Тэгеран таемна дамовіліся пра пастаўкі ў першыя дні ваеннага канфлікту, і да канца сакавіка меркаваецца завяршыць дастаўку апошніх партый. Пры гэтым колькі ўсяго апаратаў атрымае Іран, невядома. Таксама няма дакладных звестак пра тып беспілотнікаў, якія Масква згадзілася адправіць Тэгерану. Адзін з суразмоўцаў FT у заходніх разведслужбах выказаў здагадку, што гэта дроны «Герань-2», якія Расія вырабляе на аснове іранскай мадэлі Shahed-136.

«Расіяне значна ўдасканалілі «Шахеды», у тым ліку мадэрнізавалі рухавікі, навігацыйныя сістэмы і сродкі абароны ад перашкод. Такім чынам, гэтыя сістэмы ўжо з'яўляюцца больш дасканалымі, чым тыя, што Іран вырабляў унутры краіны», — адзначыла прафесар універсітэта Sciences Po Ніколь Граеўскі, якая вывучае адносіны паміж Расіяй і Іранам. Таксама, паводле даных заходніх разведслужбаў, Тэгеран папрасіў Маскву прадаставіць больш сучасныя сістэмы супрацьпаветранай абароны (СПА), аднак расійскі бок адмовіўся ад паставак С-400, баючыся эскалацыі ў адносінах з ЗША, адзначылі суразмоўцы FT.