Пад Смаленскам разлівалі падробленую Coca-Cola, вырабленую ў Беларусі

• 26.03.2026, 19:41

Яе разлівалі ў дзве змены ў антысанітарных умовах.

У Смаленскай вобласці Расіі выявілі вытворчасць падробленай газіроўкі пад маркай Coca-Cola. Яе разлівалі ў дзве змены ў антысанітарных умовах, паведаміла МУС РФ.

Вытворчасць падробленай колы «пад выглядам сусветна вядомага брэнда» выявілі ў горадзе Рудня. Напой разлівалі з дапамогай аўтаматызаванай лініі на заводзе, які цяпер знаходзіцца ў стадыі банкруцтва. Арганізатарам называюць былога дырэктара.

«Каля 20 наёмных рабочых, не маючы медыцынскіх кніжак, выраблялі напой у антысанітарных умовах у дзве змены. Пластыкавая тара выраблялася там жа. Крышкі і этыкеткі прывозіліся з іншага рэгіёна. Падробленая прадукцыя пастаўлялася ў Маскву, прычым на этыкетках было пазначана, што напой выраблены ў Грузіі, Азербайджане альбо Рэспубліцы Беларусь», — паведамілі ў МУС.

У цэху канфіскавалі амаль 38 тысяч гатовых да продажу двухлітровых бутэлек, а таксама рулоны этыкетак, крышкі, прэс-формы і дакументацыю. Яшчэ каля 11 тысяч адзінак тавару выявілі ў грузавым аўтамабілі.

Паводле ацэнкі праваўладальніка, шкода складае каля 73 тысяч долараў.

Узбуджана крымінальная справа па ч. 2 арт. 180 КК РФ (незаконнае выкарыстанне сродкаў індывідуалізацыі тавараў).