ЗСУ атаквалі авіязавод у Смаленску якраз падчас візіту Мядзведзева
- 27.03.2026, 14:09
Новыя падрабязнасці налёту дронаў.
Украінскія беспілотнікі ўвечары 26 сакавіка атаквалі Смаленскую вобласць, паведаміў губернатар Васіль Анохін у тэлеграм-канале. Паводле ягоных даных, сілы СПА і авіяцыя збілі шэсць дронаў, пасля чаго да месцаў падзення ўламкаў накіравалі падраздзяленні аператыўных службаў. Раніцай кіраўнік рэгіёна напісаў, што ўначы было сем БПЛА: «Пацярпелых і разбурэнняў няма», — запэўніў ён. Налёт дронаў ЗСУ адбываўся ў той жа дзень, калі, паводле паведамленняў Анохіна і мясцовых выданняў, рэгіён наведаў намеснік кіраўніка Савета бяспекі РФ Дзмітрый Мядзведзеў, які правёў інспекцыю выканання дзяржабаронзаказу, піша The Moscow Times.
На абаронную прамысловасць у вобласці, у прыватнасці, працуе авіяцыйны завод у Смаленску (АО «Смоленский авиационный завод» (СмАЗ)), які ўваходзіць у карпарацыю «Тактычнае ракетнае ўзбраенне» і які, верагодна, наведваў Мядзведзеў. Згодна з інфармацыяй украінскіх рэсурсаў, менавіта ён стаў мэтай атакі. «Сілы абароны нанеслі ўдар па Смаленскім авіяцыйным заводзе», — піша Exilenova+, публікуючы кадры з машынамі МНС каля прахадной завода. Гэтую інфармацыю пацвярджае Astra, адзначаючы, што да завода, які, паводле звестак спецслужбаў Украіны, выпускае крылатыя ракеты і БПЛА, прыбылі таксама машыны хуткай дапамогі і што перад прыбыццём аператыўных службаў у горадзе чулі некалькі выбухаў.
СмАЗ знаходзіцца пад санкцыямі ЗША і Канады «за ролю ў садзейнічанні або падтрымцы непракаванага і неабгрунтаванага ўварвання Расіі ва Украіну. Еўрасаюз уключыў прадпрыемства ў «чорны» спіс у сувязі з тым, што яно «выпускае ракеты Х-59, якія выкарыстоўваліся Узброенымі сіламі Расіі падчас агрэсіўнай вайны супраць Украіны». Па тых жа падставах завод трапіў пад санкцыі Украіны, Японіі і Швейцарыі. Завод ужо трапляў пад удары ўкраінскіх дронаў у лістападзе 2023 года.
На заводзе, акрамя іншага, вырабляюцца дроны-«муляжы», кампаненты для франтавой авіяцыі і ракет і самі ракеты, Х-59 і Х-101, лёгкаматорныя самалёты розных тыпаў, ракеты Х-101, а таксама праводзяцца рамонт і абслугоўванне авіятэхнікі, заяўляюць ва Украіне.