У Славакіі ўзбудзілі крымінальную справу супраць Фіцо па падазрэнні ў дзяржаўнай здрадзе

Скаргу супраць палітыка падтрымалі тысячы людзей.

Праваахоўныя органы ў Славакіі ўзбудзілі крымінальную справу супраць прэм’ер-міністра Роберта Фіцо, падазраючы яго ў дзяржаўнай здрадзе. Пра гэта паведаміў апазіцыйны палітык Браніслаў Гролінг, якога цытуе Aktuality.

Ён адзначыў, што падставай для гэтага стала заява партыі SaS, якую ўзначальвае Гролінг. Паводле слоў палітыка, яго падтрымалі тысячы людзей.

«Акрамя маіх калег з SaS, да гэтай крымінальнай заявы далучыліся больш за 13 000 чалавек, што робіць яе найбуйнейшай крымінальнай заявай у гісторыі», — заявіў Гролінг.

Ён дадаў, што справа ўжо перададзена ў паліцыю для правядзення расследавання. Паводле яго слоў, гаворка ідзе пра падазрэнне не толькі ў дзяржаўнай здрадзе, але і ў злоўжыванні ўладай, злачынствах супраць чалавечнасці і нават датычнасці да тэрарызму.

«Я перакананы, што Фіцо падазраецца ў здзяйсненні цяжкіх злачынстваў, таму цаню тое, што і пракуратура, і паліцыя дзейнічаюць у гэтым пытанні і не замоўчваюць яго», — дадаў Гролінг.

Ён патлумачыў, што прычынай скаргі на Фіцо з’яўляецца яго дзейнасць у сферы энергетычнай бяспекі. У прыватнасці — ідзе гаворка пра спыненне паставак аварыйнай электраэнергіі ва Украіну. Ён патлумачыў, што гэтая справа набыла рэзананс дзякуючы беспрэцэдэнтнай падтрымцы грамадства.

Прарасійскія заявы Фіцо

Раней Фіцо заяўляў, што Славакія можа далучыцца да вета Венгрыі на выдзяленне Украіне 90 млрд еўра ад Еўрапейскага саюза. Ён таксама падтрымаў Орбана і заявіў, што «Зяленскі не можа кіраваць ЕС».

Ён таксама спрабаваў апраўдаць міністра замежных спраў Венгрыі Петэра Сіярта, які, паводле СМІ, тэлефанаваў кіраўніку МЗС РФ Сяргею Лаўрову у перапынках паміж пасяджэннямі Еўрасаюза. Ён адзначыў, што кожны можа званіць «каму хоча», але пры гэтым адзначыў, што не бачыў ніякіх доказаў гэтага.