Маршрутка ў аэрапорт «Мінск» стала танней за аўтобус

• 27.03.2026, 17:16

Пасля падаражання ўзнік казус з тарыфамі.

Сёння ў Мінску зноў падаражаў праезд у грамадскім транспарце, і выданне Blizko.by піша, да якога казусу прывяла супярэчнасць паміж рознымі правіламі, уведзенымі напярэдадні чыноўнікамі.

У касах ужо вывесілі новыя цэннікі, а на сайце «Мінсктранса» абнавіўся файл з тарыфамі.

Акрамя іншага, падраслі тарыфы для прыгарадных аўтобусаў:

— у звычайных рэгулярных зносінах у памеры 0,14 беларускага рубля;

— у хуткасных рэгулярных зносінах у памеры 0,16 беларускага рубля;

— у экспрэсных рэгулярных зносінах у памеры 0,17 беларускага рубля.

Таксама ўсталявалі гранічныя максімальныя тарыфы на маршруткі (афіцыйна гэта называецца «гарадскія перавозкі пасажыраў і ручной паклажы аўтобусамі катэгорыі M2 ў экспрэсных рэгулярных зносінах»):

— у памеры 3,30 беларускага рубля за адну паездку з падаткам на дабаўленую вартасць;

— у памеры 5,00 беларускіх рублёў за адну паездку з падаткам на дабаўленую вартасць пры ажыццяўленні перавозак пасажыраў у гарады-спадарожнікі г. Мінска.

І вось з-за гэтых гранічных тарыфаў на маршрутку здарыўся дзіўны казус.

З Мінска ў Нацыянальны аэрапорт Мінск курсуюць аўтобус №300 (дзе ходзіць вялікі аўтобус МАЗ-203 або МАЗ-251), а таксама маршрутка №1400. Да гэтага праезд у іх каштаваў прыблізна аднолькава (маршрутка крыху даражэй).

Праезд у аўтобусе №300 «Мінсктранса» застаўся прывязаным да кіламетражу для прыгарадных маршрутаў: за 45 кіламетраў дарогі трэба заплаціць 7,6 рубля (па 0,17 рубля за 1 км).

А вось цана білета ў маршрутцы цяпер абмежаваная гранічным тарыфам для горада. Таму праезд у маршрутцы №1400 перавозчыка «Бэці Трэвэл» каштуе 3,3 рубля.

Гэта значыць, даехаць да аэрапорта на маршрутцы можна ў 2,3 раза танней, чым на аўтобусе.

Цяпер цікава будзе даведацца, наколькі новая цана праезду ў маршрутцы ўкладаецца ў сабекошт і колькі пасажыраў абяруць аўтобус, дзе трэба заплаціць удвая больш.