Пяскоў: Пуцін ухваліў «добраахвотныя ўзносы» мільярдэраў

• 27.03.2026, 19:34

Расійскія алігархі «скінуцца» на вайну ва Украіне.

Дыктатар Расіі Уладзімір Пуцін на закрытай сустрэчы з буйнымі бізнесменамі краіны не прапаноўваў рабіць добраахвотныя ўзносы ў бюджэт, але падтрымаў гэтую ідэю. Пра гэта ў пятніцу, 27 сакавіка, заявіў яго прэс-сакратар Дзмітрый Пяскоў, каментуючы адпаведнае сцверджанне, апублікаванае выданнем The Bell.

Паводле прадстаўніка кіраўніка дзяржавы, інфармацыя СМІ пра тое, што такую прапанову агучыў старшыня праўлення «Раснафты» Ігар Сечын, а таксама пра тое, што на сустрэчы абмяркоўвалася выдзяленне грошай на вайну, няправільная. «Праўда ў тым, што адзін з удзельнікаў сустрэчы сапраўды казаў, што для дзяржавы ён лічыць неабходным выдзяленне пэўнай буйной, вельмі буйной сумы грошай, і гэта было яго сямейнае рашэнне», — сказаў Пяскоў у размове з журналістамі.

Такі крок, паводле прэс-сакратара прэзідэнта, бізнесмен растлумачыў тым, што «пераважная большасць удзельнікаў сустрэчы якраз пачынала свой бізнес у 90-х гадах, і ў асноўным, вядома, гэта было так ці інакш звязана з дзяржавай». «Шмат хто лічыць сваім абавязкам зрабіць такія ўзносы», — адзначыў Пяскоў. Ён таксама ўказаў, што Пуцін «вітаў такую ініцыятыву».

26 сакавіка, пасля з'езда Расійскага саюза прамыслоўцаў і прадпрымальнікаў, на якім выступіў у тым ліку і Пуцін, прэзідэнт Расіі правёў закрытую сустрэчу з буйнымі бізнесменамі краіны. Паводле крыніц The Bell, на ёй кіраўнік дзяржавы распавёў пра планы ў ходзе вайны ва Украіне выйсці на адміністрацыйныя межы Данецкай вобласці, а затым прапанаваў рабіць добраахвотныя ўзносы ў бюджэт.

Адзін з суразмоўцаў выдання зазначыў, што ідэя «патрэсці бізнес у цяжкі для краіны час» належыць Сечыну, які за дзень да сустрэчы выклаў яе ў лісце Пуціну. Заяўляецца, што ў якасці механізму прыцягнення сродкаў у лісце было прапанавана размясціць ваенныя аблігацыі.

На просьбу проста падчас сустрэчы адгукнуліся некалькі бізнесменаў. Напрыклад, бізнесмен і член Савета Федэрацыі ад Дагестана Сулейман Керымаў паабяцаў выдзеліць 100 млрд рублёў, паведамляюць крыніцы The Bell. Яшчэ адным бізнесменам, які адгукнуўся на прапанову Пуціна, быў металургічны магнат Алег Дзерыпаска, паведаміла брытанская газета The Financial Times са спасылкай на крыніцы. Выданне таксама пацвердзіла звесткі суразмоўцаў The Bell пра тое, што Пуцін на сустрэчы заявіў пра намер працягваць вайну ва Украіне да выхаду на адміністрацыйныя межы Данецкай вобласці.

Закрытую сустрэчу бізнесменаў з Пуціным пракаментаваў і Дзерыпаска. «Нам усім патрэбны адзін і той жа вынік — каб аднавіць тэмпы эканамічнага росту. І прэзідэнт вельмі шмат увагі надаў менавіта гэтаму пытанню — якія абмежаванні, якія праблемы, якія перспектывы з улікам змененай сітуацыі на знешніх рынках», — сказаў мільярдэр у размове з Першым каналам.