Прэзідэнт Польшчы падпісаў закон аб амністыі для грамадзян, якія ваявалі ва Украіне

• 27.03.2026, 19:53

Гаворка ідзе пра амністыю для добраахвотнікаў, якія ўступілі ў Збройныя сілы Украіны без афіцыйнага дазволу ўладаў.

Прэзідэнт Польшчы Кароль Навроцкі падпісаў закон, які вызваляе ад крымінальнай адказнасці польскіх грамадзянаў, што бралі ўдзел у баявых дзеяннях на баку Украіны, перадае PAP.

Гаворка ідзе пра амністыю для добраахвотнікаў, якія ўступілі ў украінскую армію без афіцыйнага дазволу польскіх уладаў. Закон распаўсюджваецца на дзеянні, здзейсненыя з красавіка 2014 года да моманту ўступлення новых нормаў у сілу.

Пры гэтым дакумент не легалізуе саму практыку ўдзелу ў замежных узброеных фарміраваннях, а толькі здымае адказнасць за ўжо здзейсненыя парушэнні. Аўтары ініцыятывы падкрэслівалі, што закон не заахвочвае ўдзел у вайне, а датычыцца выключна адмовы ад пераследу такіх асоб.

Згодна з новымі правіламі, асобы, якія праходзілі службу, павінны будуць падаць пісьмовае паведамленне ў Міністэрства абароны Польшчы з пазначэннем тэрмінаў і месца службы.