ЦАХАЛ пацвердзіў удар па заводзе па вытворчасці ўранавага канцэнтрата ў Іране

• 27.03.2026, 22:15

Падрабязнасці.

Армія абароны Ізраіля (ЦАХАЛ) нанесла ўдар па прадпрыемстве па вытворчасці ўранавага канцэнтрата ў іранскай правінцыі Язд. Пра гэта ізраільскае ваеннае ведамства паведаміла ў Telegram-канале.

«Гэты завод адзіны ў сваім родзе ў Іране, дзе здабытая з зямлі сыравіна падвяргаецца механічнай і хімічнай апрацоўцы для далейшага выкарыстання ў якасці сыравіны для ўзбагачэння ўрану», — заявілі ў ЦАХАЛ. У ведамстве паведамілі, што гэты працэс — пачатак ланцужка вытворчасці ядзернай зброі.

Удары Ізраіля былі накіраваныя на асноўную інфраструктуру, «якая выкарыстоўваецца для ўнікальных вытворчых працэсаў», — заявілі ў ізраільскіх узброеных сілах. «Удар па гэтым аб’екце пазбаўляе іранскі тэрарыстычны рэжым сыравіны, неабходнай для гэтых працэсаў, і яшчэ больш падрывае іранскую праграму стварэння ядзернай зброі», — адзначана ў паведамленні.

Пра атаку ізраільскіх вайскоўцаў па заводзе ў Яздзе сёння ўвечары паведаміла Арганізацыя па атамнай энергетыцы Ірана. Згодна з папярэднім расследаваннем, атака не прывяла да выкіду радыеактыўных матэрыялаў за межы комплексу, і небяспекі для жыхароў не ўзнікла. Іран таксама заявіў сёння пра ўдар ЦАХАЛ па цяжкавадзяным даследчым рэактары ў горадзе Хондаб. Паводле слоў мясцовых уладаў, падчас атак ніхто не загінуў.