У Беларусі рэзка падаражэе не толькі паліва

• 28.03.2026, 12:54

Рост цаны на бензін істотна паўплывае на кашалькі.

28 сакавіка ў Беларусі адразу на чатыры капейкі вырастуць цэны на паліва. 4 красавіка яны вырастуць яшчэ на тры капейкі. Раней у краіне цэны павышаліся на адну капейку на тыдзень, гэты працэс ішоў павольна і быў амаль непрыкметны. Цяпер урад спяшаецца.

З чым гэта звязана і як гэта адаб'ецца на кашальках беларусаў у эфіры «Еўрарадыё» абмеркавалі рэдактар Павел Свярдлоў і эканаміст Аліса Рыжычэнка.

— З чым гэта звязана? Перш за ўсё з крызісам у Персідскім заліве і падаражаннем сырой нафты. Гэта ўжо адчуваюць не толькі ў іншых краінах, але і ў Беларусі — у тым ліку ў кашальках людзей, — кажа эксперт.

Рост цэн на нафту ўплывае на значна больш шырокі спектр рэчаў.

— Падаражае не толькі паліва, але і іншыя тавары і паслугі, бо ў іх кошт закладзены выдаткі на лагістыку. Калі даражэе паліва, аўтаматычна павялічваюцца і транспартныя выдаткі, што ў выніку адлюстроўваецца на канчатковай цане для спажыўца.

Такім чынам, гэта толькі першы крок. Далей, хутчэй за ўсё, мы пабачым агульны рост цэн і паскарэнне інфляцыі. Калі да гэтага дадасца яшчэ і рост курсу долара, гэта стане дадатковым праінфляцыйным фактарам.

І без таго эканамічныя паказчыкі не цалкам адпавядаюць тым, што раней прагназавалі беларускія ўлады. А цяпер, на фоне росту цэн на паліва і магчымых ваганняў валютнага курсу, сітуацыя можа яшчэ больш ускладніцца, — папярэджвае Аліса Рыжычэнка.