Стаў вядомы склад суддзяў, якія будуць вырашаць пытанне аб выдачы ордэра на арышт Лукашэнкі
- 28.03.2026, 18:19
У склад калегіі ўвайшлі тры суддзі.
Стаў вядомы склад Папярэдняй палаты Міжнароднага крымінальнага суда (МКС), якая будзе разглядаць сітуацыю ў Беларусі, у тым ліку пытанне аб магчымай выдачы ордэраў.
Пра гэта паведаміла ў Facebook беларуская юрыстка Кацярына Дзейкала.
У склад калегіі ўвайшлі тры суддзі: Юлія Моток (Румынія), Рэнэ Алапіні-Гансу (Бенін) і Сакора Флорэс Ліера (Мексіка). Калегія цалкам складаецца з жанчын.
Юлія Моток мае значны досвед у міжнародным праве: да прызначэння ў МКС яна каля дзесяці гадоў працавала суддзёй Еўрапейскага суда па правах чалавека, раней — у Канстытуцыйным судзе Румыніі. Таксама яна займала розныя пасады ў сістэме ААН, у тым ліку была спецыяльнай дакладчыцай па Дэмакратычнай Рэспубліцы Конга і па пытаннях генетыкі і правоў чалавека. Моток — доктар права і прафесарка, выкладала ў шэрагу ўніверсітэтаў.
Рэнэ Алапіні-Гансу — другая віцэ-прэзідэнтка МКС. Да працы ў судзе яна 12 гадоў была звязаная з Афрыканскай камісіяй па правах чалавека, якую ў пэўны перыяд узначальвала. Яна таксама займалася пытаннямі правасуддзя пасля генацыду ў Руандзе і працавала ў розных структурах ААН. У 2011 годзе была абраная ў Пастаянную палату трацейскага суда ў Гаазе. У сваёй краіне яна ініцыявала заканадаўчыя змены ў сферы правоў жанчын і выкладала крымінальнае права.
Алапіні-Гансу ўдзельнічала ў прыняцці рашэнняў па шэрагу гучных міжнародных спраў, у тым ліку па канфлікце ў Грузіі 2008 года. У 2024 годзе расійскі суд выдаў ордэр на яе арышт.
Сакора Флорэс Ліера — прафесійная дыпламатка, якая працавала ў сістэме Міністэрства замежных спраў Мексікі. Яна займала пасаду пастаяннай прадстаўніцы краіны пры ААН у Жэневе і ўдзельнічала ў працэсе стварэння Міжнароднага крымінальнага суда. Таксама яна прадстаўляла інтарэсы Мексікі ў Міжнародным судзе ААН у справе Avena супраць ЗША, якая датычыла парушэння правоў мексіканскіх грамадзян, асуджаных да смяротнага пакарання.
Менавіта гэтая калегія будзе прымаць рашэнні ў межах разгляду справы. Як адзначае Кацярына Дзейкала, сам працэс у МКС важны тым, што робіць больш празрыстым тое, хто і як прымае ключавыя рашэнні ў міжнародным правасуддзі.
Нагадаем, у 2024 годзе Літва перадала ў Міжнародны крымінальны суд доказы злачынстваў Лукашэнкі супраць беларусаў.