Зяленскі дамовіўся пра дызель для Украіны падчас візіту на Блізкі Усход

• 28.03.2026, 18:57

Мінімум на адзін год.

Прэзідэнт Украіны Уладзімір Зяленскі заявіў, што падчас візіту на Блізкі Усход дамовіўся аб пастаўках дызеля для Украіны мінімум на адзін год.

Пра гэта кіраўнік дзяржавы сказаў падчас зносінаў з прэсай.

Па словах Зяленскага, Украіна паставіла перад сабой дзве задачы і абедзве выканала.

«Мне трэба было дамовіцца, а далей — гэта ўжо пытанне НАК «Нафтогаза»: як у выпадку дэфіцыту і моцных выклікаў у свеце забяспечыць краіну, напрыклад, дызелем. Учора я дамовіўся пра дызель як мінімум на год. Вось. І далей гэта ўжо пытанне нашай кампаніі і мясцовых кампаній», — сказаў украінскі прэзідэнт.

Таксама ён паведаміў, што запасы паліва ва Украіне былі пустыя. Прычыны, чаму краіна іх не папаўняла, — гэта ўдары РФ з пачатку вайны, а таксама доўгатэрміновыя кантракты, якія маюць украінскія кампаніі, прыватны сектар або «Укрнафта».

«То-бок нашы рэзервы — у кантрактах. Але калі ёсць выклікі, ёсць дэфіцыт, гэта можа працаваць, а можа запавольвацца. Таму патрэбныя доўгатэрміновыя дамоўленасці з энергетычнымі краінамі, я б так сказаў. Менавіта пра гэта мы і дамаўляемся», — патлумачыў Зяленскі.

Таксама кіраўнік дзяржавы падкрэсліў, што на сёння Сілы абароны Украіны забяспечаныя палівам на ўсе 100%.

«У нас прыярытэт — армія, мы разумеем дакладны аб’ём паставак. Пастаўкі дызеля і бензіну на ўсю дзяржаву, уключаючы армію, складаюць каля 700 тысяч тон у месяц. Мы прыблізна разумеем і гадавыя аб’ёмы — недзе каля васьмі, там 7,2–7,4 млн тон у год. У прынцыпе, мы разумеем, як гэта забяспечваць», — падсумаваў ён.