Рэвалюцыя ў тэхналогіях: новы рухавік замест паліва выкарыстоўвае паветра

• 28.03.2026, 22:10

Пачынаецца новая эра касмічных тэхналогій.

Новы паветрана-электрычны рухавік здольны зрабіць рэвалюцыю ў працы спадарожнікаў, асабліва на вельмі нізкай каляземнай арбіце, піша «Фокус».

Цяпер спадарожнікі выкарыстоўваюць звычайнае паліва для падтрымання сваёй арбіты і выканання манеўраў у космасе. Але паліва павялічвае масу касмічных апаратаў, абмяжоўвае працягласць місіі і павышае яе кошт. З цягам часу спадарожнікі губляюць вышыню з-за атмасфернага супраціву і павінны расходаваць паліва, каб заставацца на арбіце.

Новы паветрана-электрычны рухавік ліквідуе патрэбу ў традыцыйным паліве. Рухавік збірае і выкарыстоўвае часціцы атмасферы Зямлі ў якасці паліва. У прыватнасці, ідзе гаворка пра атмасферныя газы: азот і кісларод. Гэтая тэхналогія дазволіць спадарожнікам устойліва працаваць на вельмі нізкай каляземнай арбіце на вышыні ад 180 да 250 кіламетраў, дзе ўсё яшчэ прысутнічаюць сляды атмасферных газаў. Рухальная сістэма ўлоўлівае гэтыя часціцы, ператварае іх у іёны і паскарае для стварэння цягі.

Такім чынам, выкарыстанне такога рухавіка зніжае стартавую масу і забяспечвае практычна неабмежаваную цягу, пакуль прысутнічаюць атмасферныя часціцы.

Новы рухавік прайшоў ключавыя выпрабаванні і рыхтуецца паўнавартасны прататып. Гэта рухальная сістэма распрацоўваецца еўрапейскімі кампаніямі TransMIT GmbH і IQM пры падтрымцы Еўрапейскага касмічнага агенцтва.

Цяпер вядзецца распрацоўка прататыпа, выпрабаванні якога запланаваныя ў вакуумных устаноўках, здольных аднаўляць умовы вельмі нізкай каляземнай арбіты.

Укараненне паветрана-электрычных рухавікоў можа істотна змяніць спадарожнікавую індустрыю. Дзякуючы павелічэнню тэрміну службы спадарожнікаў і змяншэнню залежнасці ад паліва аператары спадарожнікаў змогуць скараціць выдаткі і павысіць эфектыўнасць касмічных апаратаў.