У РФ пачалі цькаваць кіраўніка «АўтаВАЗа», які пасля інтэрв'ю з'ехаў на «Мэрсэдэсе»

• 29.03.2026, 4:00

Відэа з гэтым момантам хутка разышлося ў сеціве.

Кіраўнік «АўтаВАЗа» Максім Сакалоў апынуўся пад хваляй крытыкі з боку Z-блогераў пасля інтэрв'ю прапагандысту Аляксандру Юнашаву, бо з'ехаў не на аўтамабілі Lada, а на «Мэрсэдэсе». Відэа з гэтым момантам хутка разышлося ў сеціве і стала падставай для рэзкіх каментароў, піша The Moscow Times.

Прарасійскі прапагандыст Алег Цароў у сваім тэлеграм-канале напісаў, што ў іншай краіне ўладальнікі маглі б звольніць дырэктара аўтаканцэрна за выкарыстанне аўтамабіля іншай маркі. «Але ў нас уладальнікі не звольняць дырэктара, паколькі самі таксама не ездзяць на Lada», — абурыўся ён, дадаўшы, што «тыя, хто змагаецца з VPN, самі імі карыстаюцца».

З крытыкай выступіў і Z-прапагандыст Юрый Падаляка. Ён заявіў, што праблема «АўтаВАЗа» палягае не ў знешняй канкурэнцыі, а «ў наладках мазгавой дзейнасці яго топ-менеджменту». «І пакуль гэтую наладку не змяніць, ніякі ўтылзбор ім (і краіне ў гэтым пытанні) не дапаможа. І пачаць трэба з адмовы ад «Мэрсэдэсаў» і з перасадкі сваіх задніц на ўласныя вырабы», — выказаўся Падаляка.

Z-канал «Паўднёвы фронт» таксама раскрытыкаваў Сакалова, указаўшы на супярэчнасць паміж заявамі пра якасць айчынных аўтамабіляў і фактычнымі паводзінамі кіраўніка «АўтаВАЗа».

Прычынай для абмеркавання стала інтэрв'ю, якое 27 сакавіка ў Сакалова ўзяў Юнашаў. У ходзе размовы кіраўнік «АўтаВАЗа» заявіў, што Lada займае дамінуючае становішча на расійскім рынку. Ён таксама падкрэсліў, што кампанія не атрымлівае адраснай дзяржаўнай падтрымкі, а асцярогі наконт канкурэнцыі назваў «ілюзіяй». Адразу пасля завяршэння інтэрв'ю Сакалоў сеў у чорны «Мэрсэдэс» — меркавана мінівэн V-класа — і з'ехаў. Гэты момант трапіў на відэа.