Трамп настойліва зазывае Лукашэнку ў ЗША

• 30.03.2026, 8:00

Прэзідэнт ЗША асабіста запрасіў дыктатара на так званы Савет міру.

Прэзідэнт ЗША Дональд Трамп у сацыяльнай сетцы Truth Social напісаў, што з нецярпеннем чакае сустрэчы з Лукашэнкам.

Кіраўнік Белага дома нагадаў, што яго спецпасланец па Беларусі Джон Коул пасля перамоваў з Аляксандрам Лукашэнкам дамогся вызвалення яшчэ 250 палітвязняў.

Па словах Трампа, з мая мінулага года агульная колькасць вызваленых у Беларусі перавысіла 500 чалавек. Ён таксама падзякаваў Лукашэнку за гэты крок і заявіў, што разлічвае на сустрэчу з ім на наступным пасяджэнні так званага Савета міру.

Варта нагадаць, што Лукашэнка праігнараваў першае пасяджэнне Савета міру, што прайшло ў Вашынгтоне 19 лютага, спаслаўшыся на праблемы з лагістыкай і занятасць справамі ў Беларусі.

Эксперты мяркуюць, што Пуцін мог забараніць беларускаму дыктатару сустракацца з Трампам. Яшчэ адна версія — Лукашэнка баіцца паўтарыць лёс венесуэльскага кіраўніка Нікаласа Мадура, які вёў перамовы з ЗША, а затым быў захоплены амерыканскім спецназам.