ISW: Крэмль можа звярнуцца да прымусовай мабілізацыі

• 30.03.2026, 11:00

У РФ праблемы з наборам у армію.

У Расіі крытыкуюць неэфектыўнасць кампаніі па наборы ў беспілотныя сістэмы (БСС) на фоне прыкмет таго, што Крэмль можа звярнуцца да прымусовай мабілізацыі рэзервістаў для папаўнення страт у вайне супраць Украіны.

Пра гэта паведамляе амерыканскі Інстытут вывучэння вайны (ISW).

Аналітыкі адзначылі заяву расійскага вайсковага карэспандэнта ад 29 сакавіка, які заявіў, што набор у БСС фактычна зайшоў у тупік. Паводле яго слоў, вербавальнікі прапануюць стандартныя вайсковыя кантракты, з-за чаго патэнцыйныя навабранцы баяцца пераводу ў штурмавыя падраздзяленні пяхоты. Ён падкрэсліў, што спецыялісты па беспілотных сістэмах не павінны выкарыстоўвацца ў складзе штурмавых груп, і раскрытыкаваў няздольнасць Мінабароны РФ стварыць сучасныя і эфектыўныя падраздзяленні БСС.

Іншы расійскі вайсковы блогер падтрымаў крытыку, адзначаючы, што вайсковае кіраўніцтва пазбягае ўкаранення інавацый, якіх не разумее.

Кампанія па наборы ў БСС стартавала ў студзені 2026 года і была арыентавана, у тым ліку, на студэнтаў. Аднак апазіцыйныя крыніцы адзначалі, што прапанаваныя кантракты не гарантавалі немагчымасць пераводу навабранцаў у іншыя падраздзяленні.

Паводле даных дакладу, папярэдні механізм прыцягнення добраахвотнікаў з высокімі разавымі выплатамі страціў эфектыўнасць да канца 2025 года. Ужо ў студзені 2026 года ўзровень набору ўпершыню з 2022 года апусціўся ніжэй за ўзровень страт.

«Скаргі блогера ад 29 сакавіка паказваюць, што спробы Мінабароны Расіі абнавіць кампанію добраахвотнага набору, нават для ВПС, не даюць жаданых вынікаў», — адзначаецца ў дакладзе ISW.

Аналітыкі прагназуюць, што Крэмль рыхтуецца да абмежаваных і паступовых прымусовых прызываў рэзервістаў, якія, верагодна, будуць накіраваныя на падтрыманне баяздольнасці расійскіх сіл ва Украіне, а не на павелічэнне агульнай колькасці арміі.