Ісландыя і Нарвегія вярнуліся да ідэі ўступлення ў Еўрапейскі саюз

• 30.03.2026, 12:57

Адна з прычын — Трамп.

Ісландыя і Нарвегія вяртаюцца да ідэі ўступлення ў Еўрапейскі саюз і разглядаюць яго як крыніцу бяспекі, піша Politico. «Месца за сталом у ЕС таксама дае дадатковую бяспеку і абарону», — кажа еўракамісар па пашырэнні Марта Кос. Уварванне Расіі ва Украіну ў 2022 годзе і дзеянні прэзідэнта ЗША Дональда Трампа сталі прычынай гэтага зруху — тарыфы на імпарт і пагроза захопу Грэнландыі падштурхнулі краіны бліжэй да Бруселя. Палітыка Трампа ставіць пад сумнеў гатоўнасць ЗША абараняць саюзнікаў. Цяпер краіны НАТА шукаюць альтэрнатывы. «У НАТА адзін набор інструментаў, у ЕС — іншы», — заявіла нарвежскі палітык Інэ Эрыксэн Сёрэйдэ.

Рэйк’явік паскорыў падрыхтоўку рэферэндуму наконт аднаўлення перамоваў аб уступленні ў ЕС. «Мы былі б мацнейшыя ў вялікай групе краін з агульнымі каштоўнасцямі — дэмакратыяй, свабодай, правамі чалавека, тэрытарыяльнай цэласнасцю», — заявіла кіраўніца МЗС Ісландыі Торгердур Катрын Гуннарсдотцір. Па яе словах, прывабнасць ЕС — гэта абарона і бяспека, у тым ліку эканамічная. Ісландыя падала заяўку ў 2009 годзе падчас фінансавага крызісу, але замарозіла перамовы ў 2013 годзе і канчаткова адклікала заяўку ў 2015 годзе.

Нарвегія падавала заяўку на ўступленне ў ЕС у 1992 годзе, але адхіліла яе на рэферэндуме праз два гады. Зараз падтрымка сяброўства расце. Намесніца міністра замежных спраў Нарвегіі Марыя Вартерессян у інтэрв’ю газеце Pais заявіла, што лічыць правядзенне рэферэндуму магчымым, але не цяпер. На яе думку, пакуль вынік, верагодна, будзе адмоўным. Паводле слоў іншага нарвежскага чыноўніка, цяпер не найлепшы час заставацца ў адзіночку.