Мужчына зрабіў прапанову проста на сцэне тэатра ў Гродне

• 30.03.2026, 13:17

Дзяўчына адказала «так» пад апладысменты глядачоў.

Гісторыю пары (распавяла https://t.me/trkgrodno/33142) тэлерадыёкампанія «Гродна». Жаніх і нявеста пазнаёміліся ў Мінску на працы. Алеся толькі ўладкавалася ў калектыў, а ўжо праз тыдзень Дзмітрый патэлефанаваў ёй ранняй раніцай, каб павіншаваць з днём нараджэння. З гэтага моманту паміж імі завязаліся зносіны, а потым і стасункі.

З цягам часу ў пары з’явілася агульнае захапленне — тэатр. Жывучы ў сталіцы, яны паспелі наведаць амаль усе тэатральныя пляцоўкі горада і часта праводзілі вечары на спектаклях.

Таму месца для прапановы Дзмітрый выбраў сімвалічнае. Ён даўно абяцаў паказаць Алесі Гродзенскі драмтэатр і менавіта там вырашыў ажыццявіць задуманае. Мужчына паклікаў каханую на сцэну, сказаў усе прыгожыя словы, уручыў пярсцёнак і букет. Вядома, дзяўчына пад апладысменты глядачоў адказала «так».