ДАІ страляла па аўтамабілі ў Магілёўскай вобласці

• 30.03.2026, 17:39

Вадзіцель Audi праігнараваў патрабаванні спыніцца і спрабаваў уцячы.

У МУС паведамілі, што ў Чаўускім раёне на Магілёўшчыне супрацоўнікам ДАІ давялося выстраліць па аўтамабілі. Мера была патрэбная, каб спыніць вадзіцеля, які стварыў на дарозе рэальную пагрозу жыццю і здароўю іншых людзей.

Інцыдэнт здарыўся на трасе «Цемровічы-Васьковічы-Гарадня». Інспектары запатрабавалі ад вадзіцеля Audi спыніцца, аднак ён не паслухаўся. Таму інспектары пачалі пераслед.

Супрацоўнікі ДАІ не раз патрабавалі затармазіць, аднак у адказ мужчына, наадварот, павялічыў хуткасць. «Вадзіцель аўтамабіля Audi, спыняемся справа. Альбо будзем выкарыстоўваць зброю», — чуваць на відэа, апублікаваным МУС.

У выніку інспектару давялося страляць па колах аўтамабіля. За рулём быў 40-гадовы магілёвец, які ўжо прыцягваўся да адказнасці за кіраванне ў нецвярозым стане.

Мужчына атрымаў 4 адміністрацыйныя пратаколы, у тым ліку за непадпарадкаванне законным патрабаванням праваахоўнікаў. Які штраф яму пагражае, невядома.

Магілёўца накіравалі ў ізалятар часовага ўтрымання (ІЧУ), а яго машына цяпер на ахоўнай стаянцы.