Іран за месяц вайны нарошчыў экспарт нафты

• 30.03.2026, 17:56

Адначасова ён абмежаваў канкурэнтаў у Армузскім праліве.

Падчас вайны на Блізкім Усходзе Іран значна павялічыў экспарт нафты, адначасова фактычна абмежаваўшы праход іншых пастаўшчыкоў праз Армузскі праліў, піша Bloomberg на падставе даных аб адсочванні суднаў.

Агульная колькасць суднаў, што праходзяць праз праліў, у сакавіку рэзка скарацілася — з каля 135 у дзень да менш як шасці. Пры гэтым большасць танкераў, якія ўсё ж такі вывозяць нафту з Персідскага заліва, звязаныя з Іранам або яго партнёрамі.

Нягледзячы на бамбардзіроўкі з боку ЗША і Ізраіля, Іран нават павялічыў здабычу і экспарт: у сярэднім да 1,8 мільёна барэляў у суткі, што больш, чым летась. Дадаткова паўплывала і паслабленне амерыканскіх санкцый, дзякуючы чаму іранская нафта працягвае пастаўляцца, галоўным чынам у Кітай.

Вайна таксама прывяла да рэзкага росту сусветных цэн на нафту: сорт Brent падаражэў амаль на 60% з пачатку сакавіка. У выніку Іран значна павялічыў даходы — прыблізна да 139 мільёнаў долараў у дзень.

Акрамя таго, Іран узмацніў кантроль над пралівам і пачаў патрабаваць ад некаторых суднаў аплату і інфармацыю пра груз і экіпаж. Разглядаецца нават увядзенне афіцыйнага закону, які абавязвае ўсе караблі плаціць за праход.

Такім чынам, на фоне канфлікту Іран не толькі захаваў, але і ўмацаваў свае пазіцыі на нафтавым рынку, стаўшы адным з галоўных эканамічных бенефіцыяраў сітуацыі.