Беларусбанк папярэдзіў аб перабоях у працы

• 31.03.2026, 22:40

Якія плацяжы будуць недаступныя.

Беларусбанк папярэдзіў кліентаў аб перабоях у ажыццяўленні некаторых аперацый. Гэта звязана з тэхналагічнымі працамі, якія закрануць два часавыя перыяды.

Нязручнасці могуць узнікнуць 4 красавіка з 08:00 да 17:00. У гэты час, магчыма, не будзе функцыянаваць сэрвіс імгненных плацяжоў — сістэма грашовых пераказаў па нумары тэлефона.

Таксама некаторыя перабоі ў працы фінустановы магчымыя з 23:00 4 красавіка да 07:00 5 красавіка.

«У падраздзяленнях банка, АІС «Разлік» (АРІП) і каналах дыстанцыйнага банкаўскага абслугоўвання банка будуць недаступныя аперацыі па ўкладных і бягучых рахунках фізічных асоб, рахунках па ўліку крэдытнай запазычанасці (пагашэнне крэдытаў), дзеянні па афармленні банкаўскіх плацежных картак», — сказана на сайце Беларусбанка.

Пры гэтым аперацыі з выкарыстаннем плацежных картак будуць праходзіць без абмежаванняў.