У «Белавіі» ацанілі колькасць беларусаў, што засталіся ў ААЭ і Амане

• 4.03.2026, 8:55

Сітуацыя ўжо «крыху прагназаваная».

У ААЭ і Амане засталося каля 1300 беларускіх турыстаў, якіх неабходна вярнуць адтуль. Такую колькасць папярэдне назваў у эфіры «Беларусь 1» генеральны дырэктар авіякампаніі «Белавія» Ігар Чаргінец, піша «Зеркало».

Паводле слоў Чаргінца, цяперашняя сітуацыя ў Персідскім заліве — чарговы выклік для «Белавіі», бо «гэта не адна-дзве краіны, а цэлы рэгіён, папулярны ў нас: бізнес, дзелавыя кантакты, транзіт».

— Усе катэгорыі пасажыраў у зоне рызыкі, усе чакаюць вывазу назад. Тэарэтычна можна пераехаць у іншую краіну і вылецець, але рэгіён амаль увесь заблакаваны. Працуем з МЗС і пасольствамі — сітуацыя няпростая, але нешта атрымліваецца, — распавёў генеральны дырэктар авіякампаніі.

Ён нагадаў, што 3 сакавіка ўжо вылецеў першы вывазны рэйс з Дубая ў Мінск і анансаваў новыя на 4 і 5 сакавіка: «Сітуацыя ўжо крыху прагназаваная».

Першы вывазны рэйс з Дубая вылецеў з дазапраўкай у Актаў, а 4 і 5 сакавіка самалёты Airbus паляцяць наўпрост, без дазаправак, бо паліва хопіць.

Чаргінец патлумачыў, што ўлады ААЭ часова забаранілі ўвоз пасажыраў у Дубай. У выніку рэйсы туды выконваюцца практычна пустымі, затое назад самалёты вяртаюцца цалкам запоўненымі.

«Страты для кампаніі, але даплат не патрабуем, гэта не наша палітыка», — дадаў ён.

Паводле яго слоў, цяпер у ААЭ могуць знаходзіцца да тысячы пасажыраў, якія чакаюць вяртання ў Беларусь, яшчэ каля 300 чалавек — у Амане.

«Закрыты рэйс у Тэль-Аўіў, але гэта больш не турыстычны напрамак, таму такой вострасці там няма. Хтосьці затрымаўся, але гэта не вельмі вялікія лічбы», — сказаў Чаргінец.