Па ўсёй Беларусі вадзіцелі не могуць зарадзіць электрамабілі на станцыях Malanka

• 4.03.2026, 10:48

Што адбылося?

Сетка зарадных станцый Malanka па ўсёй Беларусі часова выйшла з ладу з-за аварыі на воблачнай платформе аператара сувязі МТС. Вадзіцелі электрамабіляў часова засталіся без магчымасці зарадзіць аўтамабілі, піша «Зеркало».

Раніцай карыстальнікі сеткі Malanka сутыкнуліся з маштабным збоем: зарадныя станцыі перасталі карэктна працаваць амаль ва ўсіх рэгіёнах краіны. Вадзіцелі паведамлялі пра немагчымасць запускаць сесіі зарадкі праз мабільнае прыкладанне і пра абмежаванне функцыяналу некаторых сэрвісаў.

Як патлумачылі ў кампаніі «Беларуснафта», адбыўся збой у працы зарадных станцый на тэрыторыі ўсёй краіны. Таксама недаступныя спецыяльнае мабільнае прыкладанне для вадзіцеляў электракараў і адміністрацыйная панэль дыспетчарызацыі.

«Прычына — у няспраўнасці сервернага абсталявання правайдара. Спецыялісты працягваюць аднаўленне сістэмы», — паведамілі ў кампаніі.

«На дадзены момант назіраюцца збоі ў працы нашага прыкладання і сайта — частка функцый часова недаступная. Паводле паведамлення ад СТАА «Мабільныя тэлесістэмы» (МТС), праблема ўзнікла на іх баку — аварыйная сітуацыя на абсталяванні воблачнай платформы. Спецыялісты МТС ужо займаюцца аднаўленнем, і мы спадзяёмся, што гэта не зойме занадта шмат часу», — удакладнілі прадстаўнікі сеткі Malanka.

Там чакаюць, калі знешні сервер запрацуе ў штатным рэжыме, і абяцаюць праінфармаваць, калі сэрвісы адновяць працу.