Звышсакрэтны знішчальнік шостага пакалення F-47 паказалі на відэа
- 4.03.2026, 11:37
F-47 распрацоўваецца ў замен F-22 Raptor.
Кампанія Pratt & Whitney выпусціла відэа, у якім, верагодна, дэманструецца будучы знішчальнік Паветраных сіл ЗША шостага пакалення F-47, піша itc.ua.
F-47 распрацоўваецца ў замен F-22 Raptor, які цяпер стаіць на ўзбраенні амерыканскіх Паветраных сіл. Зараз працягваецца этап інжынерна-тэхнічнай распрацоўкі новага знішчальніка ў рамках праграмы Next Generation Air Dominance. Першы прататып павінны падняць у паветра ў 2028 годзе.
Паводле папярэдняй інфармацыі, дэманстрацыйныя ўзоры таемна паказваліся недзе з 2020 года. Аднак праграма застаецца строга засакрэчанай. Адзінае, што СМІ ўдалося даведацца пра будучы знішчальнік, — шэраг рэндэраў, якія насамрэч нічога не дэманструюць.
Аднак вядома, што F-47 павінен стаць знішчальнікам дальняга дзеяння з максімальнай хуткасцю каля 2 400 км/г і далёкасцю палёту 1852 км. Самалёт будзе не проста баявой адзінкай, а стане цэнтрам кіравання сістэмамі, у прыватнасці падраздзяленнем аўтаномных дронаў Loyal Wingman. Ён, вядома, будзе малазаметным і здольным абыходзіць радыёлакацыйныя станцыі (радары), перад якіямі ўразлівыя F-22 або F-35 Lightning II. F-47 не будзе прызначаны для вядзення паветраных баёў, а будзе наносіць паражэнні дальнабойнымі ракетамі.
У 30-секундным відэа Pratt & Whitney, даччыная кампанія Raytheon, надае ключавую ўвагу не самому знішчальніку, а рухавіку XA-103. Гэта асноўны прэтэндэнт на выкарыстанне ў F-47. Акрамя гэтага, у роліку зроблены акцэнт на стратэгіі поўнасцю лічбавага праектавання з выкарыстаннем лічбавага двайніка для паскарэння распрацоўкі рухавіка ў параўнанні з традыцыйнымі метадамі, бо аптымізацыя кампанентаў і выпрабаванні праводзяцца яшчэ да вырабу кожнай фізічнай дэталі.
Чакаецца, што XA-103 павялічыць далёкасць палёту F-47 на 25% і забяспечыць на 10% большую цягу ў параўнанні з F-35. У самога F-47 на відэа можна заўважыць высока размешчаную кабіну, мадыфікаванае дэльтападобнае крыло і бязхваставую схему. Таксама могуць быць бачныя лапатападобны нос, пярэднія гарызантальныя стабілізатары і даволі агрэсіўныя элементы, што забяспечваюць малазаметнасць, на выхадных патрубках рухавікоў. Калі, вядома, гэта рэальны воблік будучага самалёта.
Высокапастаўленыя чыноўнікі Паветраных сіл ЗША мяркуюць, што падобныя ролікі выпускаюцца наўмысна з мэтай увесці ў зман старонніх назіральнікаў, уключаючы элементы, якія дакладна не адпавядаюць канструктыўным асаблівасцям F-47. А магчыма, рэндэр сапраўды дэманструе рэальны воблік будучага знішчальніка. Так ці інакш, з цягам часу гэта стане зразумела.