Унікальную кнігу Скарыны выявілі ў Германіі

• 4.03.2026, 14:24

У Еўропе вядома ўсяго чатыры падобныя экзэмпляры.

У бібліятэцы герцагіні Ганны Амаліі у нямецкім Веймары была выяўлена кніга, выдадзеная Францыскам Скарынам у 1522 годзе. Гэта экзэмпляр Псалтыра, які, верагодна, з’яўляецца часткай «Малой падарожнай кніжкі», піша даследчыца Вольга Шутава. Артыкул апублікаваны ў літоўскім навуковым часопісе Slavistica Vilnensis, заўважыла «Зеркало».

Веймарскі экзэмпляр Псалтыра, выдадзены ў 1522 годзе Францыскам Скарынам і, верагодна, частка «Малой падарожнай кніжкі», дагэтуль не быў вядомы даследчыкам.

Шутава адзначае значнасць адкрыцця: на сёння ў Заходняй Еўропе вядомыя толькі чатыры захаваныя падобныя экзэмпляры — два захоўваюцца ў Вялікабрытаніі, па адным — у Даніі і Славеніі.

«Экзэмпляр у добрай захаванасці, хоць варта сказаць, што пасля пажару ў Бібліятэцы ў 2004 годзе ён пацярпеў ад вады: сляды вады асабліва прыкметныя ў апошняй тэтрадзі. У 2009 годзе была праведзена рэстаўрацыя», — піша даследчыца.

Зверху на пераплёце вялікімі літарамі выціснена «PSALTERZ». На думку экспертаў бібліятэкі, пераплёт можна прыблізна датаваць XVI стагоддзем. Карэнец быў моцна пашкоджаны і падчас рэстаўрацыі заменены сучаснай скураной устаўкай. Засцёжкі адсутнічаюць, магчыма, былі зрэзаныя пры рэстаўрацыі.

На зваротным баку верхняй часткі пераплёту справа зверху алоўкам напісана «Psalter Slavon», злева тым жа почыркам, закрэслена, «Polotzk».

Экзэмпляр, хутчэй за ўсё, быў набыты бібліятэкай да 1817 года.

«Даследаванне бытавання гэтага экзэмпляра як часткі кніжнай спадчыны Францыска Скарыны на землях Цюрынгіі яшчэ наперадзе», — адзначае Шутава.