Reuters: Нават пасля скачка цэн на нафту бюджэт РФ трэшчыць

• 4.03.2026, 15:37

Дэфіцыт можа вырасці ў тры разы.

Сусветныя цэны на нафту падскочылі пасля удараў ЗША і Ізраіля па Іране і дасягнулі найвышэйшага ўзроўню з ліпеня 2024 года. Аднак гэтага росту ўсё адно недастаткова, каб збалансаваць расійскі бюджэт, сведчаць разлікі Reuters.

Адзначаецца, што Расія мае дэфіцыт федэральнага бюджэту, які павялічваецца праз недаатрыманне даходаў ад нафты і газу, што фарміруюць амаль чвэрць бюджэтных паступленняў. Хоць у аўторак сусветныя цэны на нафту перавысілі 83 даляры за барэль, расійская нафта прадаецца са зніжкай адносна міжнароднага эталона Brent crude, што пагаршае бюджэтныя праблемы.

Паводле падлікаў Reuters, у лютым сярэдні дысконт складаў 26,50 даляра за барэль. Расійская нафта прадаецца са зніжкай галоўным чынам з-за заходніх санкцый за вайну супраць Украіны, у прыватнасці праз механізм цэнавага абмежавання. З 1 лютага Еўрапейскі саюз знізіў «столь» цаны да 44,10 даляра за барэль, каб абмежаваць нафтавыя даходы Масквы.

Дзяржаўныя фінансы таксама знаходзяцца пад ціскам з-за значных выдаткаў на абарону і бяспеку пасля пачатку поўнамаштабнай вайны ў лютым 2022 года.

Паводле разлікаў агенцтва, цана расійскай нафты маркі Urals павінна вырасці больш як на 50% ад узроўню 3 582 рублі (каля 46,13 дал.) за барэль, зафіксаванага 2 сакавіка, каб дасягнуць закладзеных у бюджэце паказчыкаў.

Бюджэт РФ на 2026 год прадугледжвае сярэднюю цану нафты 5 440 рублёў за барэль (каля 59 дал.) і курс 92,2 рубля за долар. У той жа час пры ўмове стабільных нафтавых цэн рубель павінен аслабнуць прыкладна да 117,5 за долар з цяперашняга ўзроўню каля 77,65 руб./дол., каб бюджэт быў збалансаваны.

Саветнік старшыні Цэнтрабанка РФ Кірыл Трэмасаў заявіў, што рэгулятар не чакае рэзкага абвалу рубля, а цяперашні рост цэн на нафту можа апынуцца кароткатэрміновым. Паводле яго слоў, урад арыентуецца на доўгатэрміновы прагноз, а не на ваганні бліжэйшых тыдняў або месяцаў.

Па ацэнках Reuters, да канца года дэфіцыт расійскага бюджэту можа вырасці амаль у тры разы ў параўнанні з афіцыйным планам з-за скарачэння аб'ёмаў продажу нафты і паглыблення цэнавых зніжак, у той час як выдаткі могуць перавысіць запланаваныя паказчыкі.

У бюджэце на гэты год прадугледжаны паступленні ў памеры 8,92 трлн рублёў ад продажу нафты і газу, аднак цяперашнія тэмпы даходаў адстаюць ад мэтавых.