У Беларусі зачыняюць яшчэ адну прыватную ВНУ

• 4.03.2026, 18:45

Якую менавіта?

У Беларусі зачыняць яшчэ адну прыватную ВНУ. Інстытут парламентарызму і прадпрымальніцтва (ІПП) ужо апублікаваў афіцыйную заяву аб завяршэнні сваёй працы.

Падрабязнасці пры гэтым не ўдакладняюцца.

Інстытут парламентарызму і прадпрымальніцтва абвясціў пра закрыццё. У ВНУ не ўдакладнілі прычыны такога рашэння, але адначасова звярнуліся да студэнтаў.

«Настойлівая просьба! Тым, каму неабходна атрымаць дакументы, звярнуцца ў інстытут», — напісалі працаўнікі ІПП.

Нагадаем, летам 2024-га ВНУ абвясціла, што не будзе прымаць першакурснікаў. Гэтую працэдуру не ўзгадніла Міністэрства адукацыі.

Аднак тады пра закрыццё гаворкі не было.

«Мы функцыянім. Інстытут працуе і з 1 верасня, як належыць, будзе ажыццяўляць адукацыйную дзейнасць», — заяўляў рэктар інстытута Аляксандр Гарэлік.

ІПП працаваў з 1993 года і рыхтаваў спецыялістаў у галінах эканомікі, кіравання і паліталогіі. У лютым 2021-га ВНУ прайшла дзяржаўную акрэдытацыю, якая дзейнічала да 9 сакавіка 2026-га.