Лідэра гурта «Палац» прыгаварылі да трох гадоў калоніі

• 4.03.2026, 19:30

Алега Хаменку судзілі за выпускі музычных праграм.

Лідэра гурта «Палац» Алега Хаменку прыгаварылі да трох гадоў калоніі і штрафу больш за 20 тысяч рублёў за «садзейнічанне экстрэмісцкай дзейнасці». Пра гэта паведамляе Беларуская асацыяцыя журналістаў (БАЖ).

Прысуд 4 сакавіка вынес Мінскі гарадскі суд. Хаменку судзілі па арт. 361−4 (садзейнічанне экстрэмісцкай дзейнасці) за супрацоўніцтва з рэдакцыяй «Беларускае Радыё Рацыя». Падчас суда, які пачаўся 19 лютага, на экспертызу былі накіраваныя выпускі музычных праграм Хаменкі на радыёстанцыі.

Алег Хаменка — музыкант, радыёвядучы, выкладчык, кампазітар, культуртрэгер, прадзюсар. Лідар фолк-мадэрн гурта «Палац». Пра яго затрыманне стала вядома напрыканцы чэрвеня 2025 года. Пазней праваабаронцы паведамілі, што ў дачыненні да Алега Хаменкі ўзбудзілі крымінальную справу за супрацоўніцтва з незалежным беларускім медыя, якое ўключана ў спіс «экстрэмісцкіх» фармаванняў.