Культавы серыял «Гульня тронаў» атрымае поўнаметражны фільм

• 4.03.2026, 19:50

Сцэнарый піша Бо Уілліман — шоўранэр «Карткавага доміка».

Сусвет «Гульні тронаў» можа выйсці на вялікі экран. У Warner Bros. распрацоўваюць поўнаметражны фільм па культавай франшызе. Сцэнарый піша Бо Уілліман — шоўранэр «Карткавага доміка» і аўтар сцэнарыяў «Андора», паведамляе Variety.

Паведамляецца, што Уілліман ужо прадставіў чарнавік сцэнарыя. Рэжысёр праекта пакуль не прызначаны, акцёрскі склад таксама не абвешчаны.

Будучыня стужкі пры гэтым застаецца няпэўнай. Warner Bros. знаходзіцца ў працэсе продажу кампаніі Paramount Skydance, і ў разе адабрэння здзелкі новае кіраўніцтва можа перагледзець спіс праектаў у распрацоўцы. У той жа час «Гульня тронаў» застаецца адным з ключавых актываў студыі. Кіраўнік Paramount Дэвід Элісан раней заяўляў пра планы выпускаць да 30 фільмаў на год у кінапракат пасля аб’яднання кампаній — а значыць, студыі спатрэбіцца моцны кантэнт.

Паводле звестак крыніц, сюжэт будучага фільма можа быць прысвечаны Эйгону I Таргарыену — заснавальніку дынастыі Таргарыенаў і заваёўніку Вестэроса. Гэтыя падзеі адбываліся за некалькі стагоддзяў да арыгінальнага серыяла HBO. Сам Эйгон I раней на экране не з’яўляўся.

Дом Таргарыенаў ужо стаў асновай для двух паспяховых спінофаў HBO — «Дом Дракона», новы сезон якога выйдзе летам, і «Рыцар Сямі Каралеўстваў», які нядаўна завяршыў першы сезон.

Арыгінальны серыял «Гульня тронаў», створаны паводле кніг Джорджа Р. Р. Мартына, выходзіў восем сезонаў і атрымаў дзесяткі прэмій «Эмі», стаўшы адным з самых узнагароджаных праектаў у гісторыі тэлебачання.

«Гульня тронаў» стартавала на HBO ў 2011 годзе і хутка ператварылася ў глабальны культурны феномен. Пасля завяршэння серыяла ў 2019 годзе студыя засяродзілася на пашырэнні франшызы праз прыквэлы і новыя гісторыі ў сусвеце Вестэроса.