Найбуйнейшы ў свеце кантэйнерны перавозчык спыніў адпраўку грузаў у краіны Персідскага заліва
- 4.03.2026, 20:59
Рашэнне было прынята 2 сакавіка.
Дацкая транспартна-лагістычная група Maersk, якая займаецца марскімі грузавымі перавозкамі, прыпыніла прыём заказаў для краін Персідскага заліва на фоне вайны ў Іране. У кампаніі заявілі, што рашэнне было прынята 2 сакавіка па выніках ацэнкі рызык. «Прыпыняецца прыём рэфрыжэратарных, небяспечных і спецыяльных грузаў у ААЭ, Аман, Ірак, Кувейт, Катар, Іярданію, Бахрэйн, Саудаўскую Аравію і з іх — да далейшага паведамлення», — гаворыцца ў паведамленні.
Акрамя таго, Maersk прыпыніла новыя браніраванні на пастаўкі паміж краінамі Персідскага заліва і Індыяй, Пакістанам, Бангладэш, Шры-Ланкай. Выключэнне зроблена толькі для партоў Дамам і Эль-Джубайль у Саудаўскай Аравіі. Раней пацверджаныя браніраванні будуць разглядацца ў індывідуальным парадку з улікам бягучых абмежаванняў, а грузы ў дарозе застануцца пад кантролем аперацыйных службаў, перадае The Moscow Times.
28 лютага Maersk паведаміла пра спыненне на нявызначаны тэрмін рэйсаў праз Армузскую пратоку, якая забяспечвае каля 20% сусветных паставак нафты. Корпус вартавых ісламскай рэвалюцыі (КВІР) пагразіўся атакаваць любое судна, якое паспрабуе перасячы гэтую транспартную артэрыю. Пасля іранскія войскі пачалі наносіць удары па выяўленых у пратокe нафтавых танкерах, што ішлі пад сцягамі Маршалавых астравоў, Гібралтара, Гандураса і ЗША. КВІР паведамляў пра знішчэнне 10 суднаў.
Maersk — найбуйнейшы ў свеце аператар кантэйнерных перавозак са штаб-кватэрай у Капенгагене. Флот кампаніі налічвае некалькі сотняў суднаў, а яе паслугі ахопліваюць усе ключавыя марскія гандлёвыя маршруты.
28 лютага ЗША і Ізраіль пачалі ваенную аперацыю супраць Ірана пасля правалу перамоваў па ядзернай здзелцы. У першыя дні быў забіты Вярхоўны лідар Ісламскай Рэспублікі аятала Алі Хаменеі і іншыя члены кіраўніцтва — усяго 49 чалавек, паводле даных прэзідэнта ЗША Дональда Трампа.
У сваю чаргу Іран атакаваў ваенныя базы ЗША на Блізкім Усходзе і інфраструктуру краін-саюзнікаў Вашынгтона ў Персідскім заліве. Акрамя Ізраіля, пад удар трапілі Саудаўская Аравія, ААЭ, Бахрэйн, Іярданія і Катар. Апошні ў адказ нанёс удар па Іране, адзначыўшы, што рэспубліка «перайшла ўсе чырвоныя лініі», паколькі яе мэтай былі грамадзянскія аб’екты, у тым ліку аэрапорт Дохі і газавая інфраструктура. У ААЭ таксама пачалі разглядаць магчымасць удару ў адказ па Іране, паведамляў Axios.