У Мінск з Дубая вярнулі яшчэ 283 беларусаў

• 4.03.2026, 23:02

Палёт выконваўся па бяспечным маршруце.

Чарговы вывазны рэйс авіякампаніі «Белавія» прыбыў з Дубая ў Мінск увечары 4 сакавіка. Самалёт прызямліўся ў Нацыянальным аэрапорце Мінск каля 18:00 без затрымак.

Палёт выконваўся па бяспечным маршруце з улікам дзейных абмежаванняў у паветранай прасторы. На борце Airbus A 330‑200 знаходзіліся 283 пасажыры, у тым ліку двое немаўлят.

Гэта ўжо другі вывазны рэйс з ААЭ за суткі. Першы прыляцеў уначы і даставіў у Мінск не толькі беларусаў, але і грамадзян Расіі. Таксама запланаваны дадатковыя рэйсы з Дубая ў Мінск.

Паводле папярэдняй інфармацыі, у Аб’яднаных Арабскіх Эміратах знаходзіцца каля 2,5 тысячы арганізаваных беларускіх турыстаў. Складанасці з вяртаннем узніклі пасля закрыцця паветранай прасторы шэрагу краін рэгіёна з-за ракетных удараў па Іране, што прымусіла авіякампаніі тэрмінова змяняць расклад і шукаць бяспечныя маршруты.