У Мінску ствараюць базу ўсіх хатніх жывёл

• 5.03.2026, 11:21

Спачатку рэсурс будзе даступны толькі для ветэрынарных урачоў.

У Мінску хочуць стварыць інфармацыйную базу ўсіх хатніх жывёл, піша БелТА.

Так, Мінгарветстанцыя плануе на працягу бліжэйшых гадоў распрацаваць інфармбазу, дзе зарэгіструюць усіх хатніх жывёл і жывёл-кампанёнаў. У базу ўнясуць звесткі пра нараджэнне жывёлы, вакцынацыі і іншыя ветэрынарныя маніпуляцыі, пра ўладальніка і пра чыпіраванне (калі яно было зроблена).

- Таксама ў базу будуць уносіць падказкі для ветэрынарных урачоў, якія будуць весці прыём, - распавёў начальнік Мінскай гарадской ветэрынарнай станцыі Дзмітрый Шалойка.

Спачатку рэсурс будзе даступны толькі для ветэрынарных урачоў, але ў планах на будучыню адкрыць доступ і для ўладальнікаў жывёл, каб яны маглі паглядзець вынікі аналізаў, даныя пра апошнія вакцынацыі і г.д. Пры паспяховай рэалізацыі праекта досвед Мінска могуць маштабаваць на ўсю краіну.