У Мінску вырашылі знесці яшчэ 105 прыватных дамоў

• 5.03.2026, 12:04

Названыя канкрэтныя тэрміны.

Сталічная мэрыя прыняла канчатковае рашэнне аб зносе яшчэ адной прыватнай забудовы ў межах горада. На гэты раз вырашылі знесці 105 дамоў у прыватным сектары мікрараёна Серабранкі — былыя вёскі Шэйпічы і Дварышчы, піша «Тэлеграф».

Гарадабудаўнічы праект з дэталёвым планам зносу і будучай забудовы нядаўна выклалі на Нацыянальным прававым партале, і ён ужо ўступіў у сілу.

Згодна з рашэннем Мінскага гарадскога выканаўчага камітэта, маштабныя змены закрануць тэрыторыю агульнай плошчай 154 га, размешчаную па абодвух баках ракі Свіслач у мікрараёне Серабранкі. 105 прыватных дамоў там пойдуць пад знос, а на іх месцы павінны з’явіцца месцы для адпачынку, спорту і забаў, шэраг грамадскіх аб’ектаў, а таксама новы прыродны парк, па якім можна будзе пракаціцца па веладарожцы.

У дакуменце прапісаныя канкрэтныя тэрміны зносу жылой забудовы. Паводле дадзеных партала Realt.by, на першым этапе — да 2027 года — зоймуцца добраўпарадкаваннем тэрыторыі прыроднага парку з боку вуліцы Якубова. Знос жылых дамоў запланаваны на другі этап праекта — да 2030 года.

Паводле звестак партала, прыватны сектар будуць зносіць у наступнай паслядоўнасці: першымі знікнуць дамы былой вёскі Шэйпічы, наступнымі знесуць Дварышчы, а апошнімі стануць дамы на вуліцы Сямёнава.

Яшчэ адным важным для жыхароў мікрараёна этапам рэканструкцыі гэтага ўчастка стане пашырэнне дзеючай трамвайнай лініі. Трамваі плануюць пусціць па праспекце Ракасоўскага і працягнуць існы маршрут па вуліцы Якубова да вуліцы Малініна. Для гэтага плануецца перанос разваротнага кальца.