Пуцін назірае за Іранам збоку

• 5.03.2026, 12:53

Крэмль асцярожнічае.

Расія заняла асцярожную пазіцыю пасля сумесных авіяўдараў ЗША і Ізраіля па Іране. Паводле паведамленняў СМІ, расійскія ўлады і дзяржаўныя медыя пазбягаюць прамой крытыкі дзеянняў Вашынгтона, нягледзячы на жорсткую рыторыку ў адрас саміх удараў, піша Nationalinterest (пераклад — сайт Charter97.org).

Расійскія дзяржаўныя СМІ апісваюць атакі як «падступнае нападзенне» на саюзніка, аднак Крэмль пакуль устрымліваецца ад асабістай крытыкі прэзідэнта ЗША Дональда Трампа. Пуцін таксама не рабіў рэзкіх заяў, што аналітыкі тлумачаць жаданнем Масквы захаваць каналы дыялогу з Вашынгтонам на фоне абмеркавання будучыні вайны ва Украіне.

Эксперты лічаць, што Іран паступова перастае быць ключавым прыярытэтам для Расіі. У Крамлі могуць спадзявацца, што ўзмацненне канфлікту на Блізкім Усходзе адцягне ўвагу ЗША і іх рэсурсы ад украінскага накірунку. Расійская «спецыяльная ваенная аперацыя» ва Украіне цягнецца ўжо пяты год і застаецца галоўным знешнепалітычным выклікам для Масквы.

Тым часам расійская знешняя разведка абвінаваціла Вялікабрытанію і Францыю ў перадачы Украіне кампанентаў для стварэння ядзернай зброі, не прадставіўшы доказаў. Аналітыкі лічаць, што падобныя заявы могуць выкарыстоўвацца для ўнутранай мабілізацыі і адцягнення ўвагі ад праблемаў у сферы абароны.

Так, нядаўна ўкраінская ракета нанесла ўдар па заводзе ў горадзе Воткінск, дзе вырабляюцца балістычныя ракеты «Іскандэр» і міжкантынентальныя ракеты. Расійскія ўлады мінімізавалі асвятленне гэтага інцыдэнту.

Адначасова Крэмль праводзіць перабудову палітычнай эліты. У межах праграмы «Час герояў» ветэранаў вайны паскорана прасоўваюць на дзяржаўныя пасады. Мяркуецца, што новая эліта будзе больш лаяльнай дзейнаму кіраўніцтву краіны.