Сікорскі рэзка адрэагаваў на захоп Венгрыяй украінскіх інкасатараў

• 6.03.2026, 16:38

І патроліў Орбана.

Міністр замежных спраў Польшчы Радаслаў Сікорскі пракаментаваў затрыманне інкасатараў украінскага «Ашчадбанка» у Венгрыі.

У пятніцу, 6 сакавіка, Сікорскі падзяліўся ў X паведамленнем кіраўніка МЗС Украіны Андрэя Сыбігі пра затрыманне і пракаментаваў: «Яны [венгры] з'елі зебраў, яны ўкралі грошы».

Сваімі словамі пра зебраў польскі міністр нагадаў пра скандал, звязаны з прэм'ер-міністрам Венгрыі Віктарам Орбанам. У жніўні 2025 года венгерскае выданне Telex апублікавала кадры з тэрыторыі маёнтка, звязанага з сям'ёй Орбана. У прыватнасці, там было відаць шматпавярховыя будынкі з ліфтамі, падземны паркінг, басейн і нават зебраў, якія хадзілі па тэрыторыі маёнтка.

Сам Орбан сцвярджаў, што маёнтак належыць не яму, а яго бацьку, і што гэта нібыта ферма, якая нават не дабудаваная.