Названы карысны для печані спосаб ужывання кавы

• 6.03.2026, 21:39

Яшчэ адно пацвярджэнне карысці гэтага напою.

Рэгулярнае ўжыванне «кавы па-італьянску» — невялікімі порцыямі па 20–30 мл — можа зніжаць рызыку неалкагольнага атлусцення печані. Да такой высновы прыйшлі навукоўцы з Тэлематычнага ўніверсітэта Сан-Рафаэле (Італія). Вынікі даследавання апублікаваныя ў часопісе Frontiers in Nutrition.

«Атлусценне печані» (тлушчавы гепатоз, стеатоз печані) — гэта захворванне, пры якім у клетках печані назапашваецца лішняя колькасць тлушчу, пераважна трыгліцерыдаў. Калі гэты паказчык расце, печань пачынае павялічвацца ў памерах, а яе функцыянальныя магчымасці паступова зніжаюцца. Адначасова павышаецца рызыка развіцця цырозу і раку.

Даследчыкі прааналізавалі даныя аб ужыванні кавы і стане здароўя дарослых добраахвотнікаў і выявілі, што па меры павелічэння колькасці кавы ў рацыёне рызыка захворвання зніжалася. У параўнанні з людзьмі, якія пілі менш за адну чашку ў дзень, адна чашка кавы была звязаная амаль з двайным зніжэннем рызыкі MASLD.

Пры ўжыванні дзвюх і трох чашак паказчык заставаўся прыблізна на тым жа ўзроўні, а найбольш выразная сувязь назіралася ў людзей, якія выпівалі чатыры–шэсць чашак у дзень.

Аўтары падкрэсліваюць, што гаворка ідзе менавіта пра «каву па-італьянску» — невялікія порцыі моцнага эспрэса. Такая чашка звычайна складае каля 20–30 мілілітраў і адрозніваецца ад вялікіх кубкаў фільтр-кавы. Па словах даследчыкаў, спосаб прыгатавання і канцэнтрацыя біалагічна актыўных рэчываў могуць узмацняць патэнцыйны ўплыў напою на абмен рэчываў.

«Кава змяшчае дзясяткі біалагічна актыўных злучэнняў, уключаючы антыаксіданты і поліфенолы, якія здольныя ўплываць на метабалічныя працэсы і запаленне. Гэтыя рэчывы могуць удзельнічаць у абароне клетак печані», — адзначылі навукоўцы.

Аўтары адзначаюць, што даследаванне мае назіральны характар і не даказвае прамой прычынна-выніковай сувязі. Тым не менш вынікі ўказваюць на магчымую ролю ўмеранага ўжывання кавы як фактара падтрымкі здароўя.