Вугальны крах РФ: спыненая праца адной з найбуйнейшых шахтаў
- 7.03.2026, 10:23
Галіна ў мінусе на сотні мільярдаў.
Расійская металургічная група ММК абвясціла пра прыпыненне здабычы на шахце «Чэрцінская-Коксавая» ў Кемераўскай вобласці. Прадпрыемства будзе пераведзена ў рэжым так званай сухой кансервацыі пасля таго, як эканамічныя ўмовы зрабілі яго працу нерэнтабельнай. Паведамленне пра гэта распаўсюдзіла даччыная структура кампаніі «ММК-Вугаль», перадае Dialog.UA.
Згодна з афіцыйнымі дадзенымі, рашэнне звязана адразу з некалькімі неспрыяльнымі фактарамі. «Рашэнне дыктуецца істотным зніжэннем цэн, ростам выдаткаў, а таксама скарачэннем спажывання з боку металургічных прадпрыемстваў», — гаворыцца ў заяве кампаніі.
Шахта «Чэрцінская-Коксавая» з’яўляецца адным з найбуйнейшых здабыўных актываў групы. У 2025 годзе на ёй было здабыта больш за 1,2 мільёна тон вугалю.
Аднак у апошнія кварталы сабекошт здабычы на гэтым аб’екце значна перавышаў рыначную цану сыравіны, што зрабіла працяг працы эканамічна бессэнсоўным.
Фінансавае становішча самой групы таксама пагоршылася. Па выніках 2025 года ММК паведаміў пра сукупныя страты і прызнаў абясцэньванне вугальназдабыўчага сегмента на касмічную суму каля 28 млрд рублёў. Сярод прычын названыя высокая ключавая стаўка і складаныя макраэканамічныя ўмовы.
Сітуацыя адлюстроўвае больш шырокі крызіс у расійскай вугальнай галіне. За апошнія гады кампаніі страцілі частку экспартных рынкаў з-за вайны і санкцый, сутыкнуліся з цяжкасцямі з разлікамі, абмежаваннямі транспартнай інфраструктуры і слабой рынкавой кан’юнктурай. Гэтыя фактары рэзка скарацілі даходнасць здабычы.
Паводле даных расійскай статыстыкі, сукупны фінансавы вынік вугальнай галіны да падаткаабкладання за першыя адзінаццаць месяцаў мінулага года аказаўся адмоўным і склаў 334,9 млрд рублёў. Толькі за адзін месяц страты павялічыліся яшчэ на 7 млрд рублёў.
У спробе ўтрымаць галіну на плаву ўрад РФ падоўжыў праграму падтрымкі вугальных прадпрыемстваў з 1 снежня 2025 года яшчэ на тры месяцы — да сакавіка 2026 года. У прыватнасці, кампаніям прадаставілі адтэрміноўкі па падатках і страхавых плацяжах. Аднак нават гэтыя меры толькі часткова знізілі рызыку банкруцтваў.
Праблемы закранулі і іншыя галіны цяжкай прамысловасці. На фоне падзення ўнутранага попыту на сталь і запаволення дзелавой актыўнасці прадпрыемствы пачалі скарачаць працоўны час і аптымізаваць вытворчасць. Шэраг шахтаў Кузбаса ўжо часова спыняў здабычу, а буйная вугальная кампанія «Мечэл» была вымушаная спыніць адзін са сваіх аб’ектаў і скараціць выпуск нерэнтабельных марак вугалю.
Нават металургічныя прадпрыемствы, якія раней лічыліся больш устойлівымі, сутыкаюцца са скарачэннем заказаў. Нядаўна найбуйнейшы расійскі вытворца сталёвых труб паведаміў пра прыпыненне працы трубапракатнага цэха на Першуральскім наватрубным заводзе з-за слабога попыту.
Зніжэнне спажывання металу ў Расіі стала прыкметным яшчэ ў 2024 годзе. Па выніках мінулага года ўнутраны рынак сталі скараціўся прыкладна на 14%, прычым спад назіраўся практычна ва ўсіх ключавых сектарах эканомікі.
Эксперты таксама звязваюць паглыбленне крызісу ў цяжкай прамысловасці з наступствамі вайны, якую Расія вядзе супраць Украіны. Затяжны ваенны канфлікт прывёў да маштабных санкцый, скарачэння гандлю, росту бюджэтных выдаткаў і паступовага знясілення рэсурсаў эканомікі.