Анджэй Пачобут стаў лаўрэатам прэміі Анджэя Вайды

• 7.03.2026, 18:24

Замест палітвязня, які знаходзіцца ў лукашэнкаўскіх засценках, ўзнагароду атрымала яго дачка.

Журналіст, палітвязень, адзін з лідараў польскай дыяспары ў Беларусі Анджэй Пачобут стаў лаўрэатам прэміі імя Анджэя Вайды, якую штогод уручвае фонд «Кіёта—Кракаў». Таксама прэмію атрымала жонка лідара «Салідарнасці», першага прэзідэнта Польшчы Леха Валэнсы Данута. Замест Анджэя Пачобута, які знаходзіцца ў лукашэнкаўскай турме, прэмію атрымала яго дачка, паведамляе TVP.

«Анджэй Пачобут, журналіст, публіцыст і дзеяч Саюза палякаў у Беларусі, на працягу многіх гадоў з’яўляецца сімвалам непахіснай барацьбы за праўду, правы чалавека і свабоду слова. Яго пазіцыя, якая спалучае мужнасць з глыбокім пачуццём адказнасці, з’яўляецца сведчаннем салідарнасці паміж народамі Польшчы і Беларусі і напамінам пра тое, што каштоўнасці, важныя для Анджэя Вайды — свабода, годнасць і праўда — універсальныя і па-за часам», — заявілі прадстаўнікі фонду, які ўручае ўзнагароду.

Журналіста і лідара ліквідаванага ўладамі «Саюза палякаў у Беларусі» Анджэя Пачобута затрымалі ў 2021 годзе. У лютым 2023 года яго прысудзілі да 8 гадоў калоніі паводле артыкулаў аб распальванні варожасці і закліках да дзеянняў супраць нацыянальнай бяспекі (артыкулы 130 і 361 КК).